کراچی سے خیبر تک پاک فوج سے اظہار یکجہتی ریلیاں،سبز ہلالی پرچموں کی بہار

لاہور،کراچی،پشاور،کوئٹہ:(خبر نگار،بیورورپورٹ)کراچی سے خیبر تک پاک فوج سے اظہار یکجہتی ریلیاں،فضا پاکستان زندہ باد کے نعروں سے گونج اٹھی۔

بھارتی جارحیت کےخلاف چاروں صوبوں میں عوام سڑکوں پر نکل آئے، پاک فوج سے اظہار یکجہتی ریلیاں نکالی گئیں، شہریوں نے فلک شگاف نعرے لگا کر دشمن کو دوٹوک پیغام دیا پوری قوم افواج پاکستان کے شانہ بشانہ کھڑی ہے،عوام نے ہاتھوں میں سبز ہلالی پرچم،بینرز ، پلے کارڈز اٹھا رکھے تھے جن پر پاکستان زندہ باد‘پاک فوج زندہ باداور بزدل دشمن مردہ باد جیسے نعرے درج تھے۔

بلوچستان کے سرحدی شہر چمن میں ہندو برادری نے بھی بھارت کےخلاف احتجاجی ریلی نکال کر قومی اتحاد و یکجہتی کی مثال قائم کردی، شرکا نے پلے کارڈز اٹھا کر بھارتی جارحیت کےخلاف نعرے لگائے،شہر شہر نکالی گئی ریلیوں میںبچوں، نوجوانوں اور بزرگوں کی بڑی تعداد نے شرکت کی، شرکا نے عزم کا اعادہ کیا ملکی سالمیت اور خودمختاری پر کوئی سمجھوتہ نہیں کیا جائے گا۔