دہشتگردی کو جڑ سے اکھاڑنے کیلئے آخری دم تک کوششیں جاری رکھیں گے،صدر

لاہور:(سٹاف رپورٹر)صدر مملکت آصف زرداری نے کہاہے دہشتگردی کے فتنے کو جڑ سے اکھاڑنے کیلئے آخری دم تک کوششیں جاری رکھیں گے،آصف زرداری شہید کیپٹن علی قریشی کی رہائشگاہ گئے، اہل خانہ سے اظہار تعزیت ،فاتحہ خوانی کی۔

صدر مملکت نے شہید کیپٹن علی قریشی کی خدمات ،بہادری کو خراج عقیدت پیش کرتے ہوئے کہا مشکل گھڑی میں ہمدردیاں شہید کے اہل خانہ کےساتھ ہیں، دہشتگردی کےخلاف جنگ میں بہت سے جوانوں نے جانوں کا نذرانہ پیش کیا، شہید محترمہ بےنظیر بھٹو بھی دہشت گردی کےخلاف جنگ میں شہید ہوئیں،دہشت گردی کے فتنے کو جڑ سے اکھاڑنے کیلئے آخری دم تک کوششیں جاری رکھیں گے۔

آصف زرداری نے شہید کیپٹن کے اہل خانہ کے جذبہ حب الوطنی اور ایثار کو سراہتے ہوئے کہا قوم شہدا ،خاندانوں کی قربانیوں کو ہمیشہ یاد رکھے گی، قبل ازیں صدر مملکت آصف زرداری کا لاہور آمد پر سپیکر پنجاب اسمبلی ملک احمد خان نے ائیرپورٹ پر استقبال کیا،آئی جی پنجاب ،سی سی پی او لاہور سمیت دیگر اعلیٰ سرکاری افسر بھی موجودتھے۔