چینی شہریوں کے سکیورٹی پلان پر عملدرآمد یقینی بنایاجائے،غفلت کی گنجائش نہیں،محسن نقوی

اسلام آباد:(بیورورپورٹ) وفاقی وزیر داخلہ محسن نقوی نے کہاہے چینی شہریوں کے سکیورٹی پلان پر من وعن عملدرآمد یقینی بنایاجائے،کسی قسم کی غفلت کی گنجائش نہیں۔

محسن نقوی کی زیرصدارت وزارت داخلہ میں ہونےوالے اجلاس میں غیر ملکیوں خصوصاً چینی شہریوں کے حفاظتی اقدامات کا جائزہ لیا گیا، وزارت داخلہ سمیت متعلقہ اداروں کی جانب سے سکیورٹی پلان و مجموعی صورتحال پر بریفنگ دی گئی۔

وزیر داخلہ محسن نقوی نے سکیورٹی پلان کے ایس او پیز پر من و عن عملدرآمد کرنے کی ہدایت کرتے ہوئے کہا وضع کردہ پلان کی ہر سطح پر باقاعدہ مانیٹرنگ کی جائے،ملک دشمن عناصر کے مذموم عزائم خاک میں ملانے کےلئے متعلقہ ادارے قریبی رابطہ رکھیں، سکیورٹی پلان پر کسی قسم کی غفلت کی گنجائش نہیں۔