الیکشن کے ضابطہ اخلاق پر عملدرآمد یقینی بنایا جائےگا: ظہیر انور

بہاولپور:(بیورورپورٹ)ضابطہ اخلاق عام انتخابات 2024ءکے سلسلہ میں اسلامیہ یونیورسٹی بہاول پور کے غلام محمد گھوٹوی ہال میں سمپوزیم ہوا جس میں ڈپٹی کمشنر و ڈسٹرکٹ ریٹرننگ آفیسر ظہیر انور جپہ، ڈسٹرکٹ پولیس آفیسر سید عباس شاہ،ڈسٹرکٹ الیکشن کمشنر قیوم،ایڈیشنل کمشنر (رابطہ) جام آفتاب حسین، ایڈیشنل ڈپٹی کمشنر (جنرل) نعیم صادق چیمہ، مانیٹرنگ افسران،انتخابی امیدواران ، الیکشن ایجنٹ اور مختلف سیاسی جماعتوں کے اراکین موجود تھے۔

اس موقع پر ڈپٹی کمشنر و ڈسٹرکٹ ریٹرننگ آفیسر ظہیر انور جپہ نے اظہار خیال کرتے ہوئے کہا الیکشن کمیشن آف پاکستان کے طے شدہ قواعد و ضوابط کے مطابق الیکشن کے انعقاد اور ضابطہ اخلاق پر عمل درآمد کو یقینی بنایا جائے گا،ڈسٹرکٹ پولیس آفیسر سید عباس شاہ نے کہا انتخابی عمل کو پرامن، شفاف اور ضابطہ اخلاق کے مطابق انعقاد کےلئے تمام ضروری اقدامات بروئے کار لائے جائیں گے،قبل ازیں ڈسٹرکٹ الیکشن کمشنر ایم قیوم نے ضابطہ اخلاق برائے عام انتخابات 2024ءکی تفصیلات سے آگاہ کیا۔