پارکس اینڈ ہارٹیکلچر اتھارٹی کے زیراہتمام وسیع و عریض پارک کےلئے تعمیراتی عمل کا آغاز

فیصل آباد(بیورورپورٹ)پارکس اینڈ ہارٹیکلچر اتھارٹی کے زیراہتمام پرانی سبزی منڈی نزد بابر سینما رحمانیہ روڈ پر وسیع وعریض پارک کے قیام کے لئے تعمیراتی عمل کا آغاز ہوگیا ہے۔ڈپٹی کمشنر عبداللہ نیئر شیخ نے موقع پر جاکر فیتہ کاٹ کر میگا پراجیکٹ کے تعمیراتی عمل کا افتتاح کیااورسٹیٹ آف دی آرٹ پراجیکٹ پر عملدرآمد بارے بریفنگ لی۔

ڈپٹی کمشنر نے بتایا کہ 43 کنال 8 مرلہ اراضی پر 32 کروڑ روپے کی لاگت سے وسیع وعریض پارک 3 ماہ کے مختصر وقت میں مکمل ہوگا ۔ انہوں نے کہا کہ پارک کے قیام سے بڑی آبادی کو معیاری تفریحی سہولیات میسر آئیں گی۔انہوں نے پی ایچ اے کو پراجیکٹ پر تیز رفتار عملدرآمد کی ہدایت کرتے ہوئے کہا کہ موقع پر موجود رہ کر تعمیراتی مراحل کی مسلسل نگرانی کی جائے۔ڈی جی پی ایچ اے ضمیر حسین نے بتایا کہ پارک میں آہنی چار دیواری ، اندرونی وبیرونی واک وے ٹریک،آﺅٹ ڈورجم سیٹ،بچوں کے لئے تفریحی جگہ،فوارے،تاریخی ورثہ پر مشتمل باغ،پبلک واش رومز،الیکٹریکل ومکینیکل ورک،ہارٹیکلچر ورک،فوڈ کورٹ اور پارکنگ ایریا ودیگر تفریحی سہولیات پارک کے منصوبہ میں شامل ہیں۔

اہل علاقہ نے پارک کا کام شروع ہونے پر ضلعی انتظامیہ اور پی ایچ اے کا شکریہ اداکیا اور کہا کہ علاقہ عرصہ دراز سے پارک کی سہولت سے محروم تھا اب پارک کے قیام سے لوگوں اور بچوں کو معیاری تفریحی سہولت میسر آئے گی۔