جی ایچ کیو حملہ کیس میں وارنٹ ،صوبے کے حالات غلط پالیسی سے خراب ہیں،گنڈا پور

راولپنڈی ،پشاور:(بیورورپورٹ) جی ایچ کیو حملہ کیس میں وزیر اعلیٰ علی امین گنڈا پور کے وارنٹ،عدالت نے گرفتار کرکے پیش کرنے کاحکم دےدیا۔

انسداد دہشتگردی عدالت راولپنڈی کے جج امجد علی شاہ نے جی ایچ کیو حملہ کیس پر سماعت کی، سپیشل پراسیکیوٹر نے ملزموں کی غیر حاضری پر وارنٹ گرفتاری جاری کرنے کی استدعا کی،عدالت نے غیر حاضری پر علی امین گنڈا پور کے وارنٹ گرفتاری جاری کرتے ہوئے عدالت پیش ہونے کا حکم دیدیا،عدالت نے راجہ بشارت، زرتاج گل، بلال اعجاز سمیت دیگر 46 ملزموں کے بھی وارنٹ گرفتاری جاری کر دیئے ۔

دوسری جانب وزیراعلیٰ کے پی علی امین گنڈا پور نے کانوکیشن سے خطاب میںاقرا نیشنل یونیورسٹی کیلئے 3 کروڑ روپے گرانٹ کا اعلان کرتے ہوئے کہاصوبے کے حالات غلط پالیسی کی وجہ سے خراب ہیں،خوشی ہوئی یونیورسٹی پرائیویٹ سیکٹر میں تعلیم کے فروغ کیلئے کام کررہی ہے، حکومت کبھی بھی عوام اور نجی شعبے کے تعاون کے بغیر ترقی نہیں کرسکتی، مسائل کے حل کیلئے ملکر کردار ادا کرنے پر پرائیویٹ سیکٹر کو سپورٹ کریں گے۔

علی امین گنڈا پور نے کہاصوبے کے حالات غلط پالیسی کی وجہ سے خراب ہیں، صوبے میں قیام امن کیلئے فورسز اور عوام نے قربانیاں دیں،مقابلہ کرنا سیکھیں، آپ کو کوئی بھی شکست نہیں دے سکتا،ایف آئی آر بھی ڈگری ہوتی ہے، مجھ پر 256 ایف آئی آر درج کی گئیں۔