تمام سازشی کردار انجام کو پہنچ گئے،21اکتوبر کو اچھے دن واپس آرہے ہیں،مریم نواز

لاہور (اپنے رپورٹر سے) مسلم لیگ (ن) کی سینئر نائب صدر و چیف آرگنائزر مریم نواز نے کہا ہے نوجوانوں کومذموم مقاصد کےلئے استعمال کیاگیا، تمام سازشی کردار اپنے انجام کو پہنچ گئے، نوازشریف کو نکالا تو ملک سے ترقی ،خوشحالی ،امن وسکون بھی نکل گیا، اب مینار پاکستان پر ملکر پاکستان کی ترقی کا عہد کریں گے۔

ن لیگ اقلیتی ونگ کے مشاورتی اجلاس سے خطاب کرتے ہوئے مریم نواز نے کہاسب کچھ بھلا کر پاکستان کی ترقی پر توجہ مرکوز کرنی ہے،نواز شریف نے قوم سے ہر وعدہ پورا کیا اب معاشی طور پر خود انحصار پاکستان بنانے کا وعدہ پورا کریں گے،کوئی اقلیت کوئی اکثریت نہیں، سب پاکستانی ہیں، قومی سطح پر اقلیتوں کی آواز کو طاقتور اور توانا بناکر پاکستان کو مضبوط کریں گے، قومی فیصلہ سازی میں اقلیتوں کے کردار و آواز کو بڑھانا ہے۔

سینئر نائب صدر ن لیگ نے کہانواز شریف عوام اور ملک کو مشکلات سے نکالنے آ رہا ہے، 21اکتوبر کو پاکستان کے اچھے دن واپس آرہے ہیں، 21اکتوبر کو پاکستان کی خوش حالی واپس آرہی ہے، 21اکتوبر کو مہنگائی میں کمی واپس آرہی ہے، قائد نواز شریف 21اکتوبر کو پاکستان کی ترقی کا ویژن دیں گے، آئین کے مطابق غیرمسلم پاکستانیوں کے حقوق کے تحفظ کا ایجنڈا دیں گے، جیسے ایک آزاد پاکستان بنا تھا اب قرض، مہنگائی اور معاشی بدحالی سے آزاد پاکستان بنائیں گے۔