لاہور (مرزا ندیم بیگ )یکم جنوری 2026 سے تاحال شہر میں ٹریفک قوانین کی خلاف ورزیوں کے خلاف جاری مہم کے دوران پنجاب ٹریفک پولیس نے مجموعی طور پر لاکھوں گاڑیوں کے چالان کئے۔ سرکاری اعداد و شمار کے مطابق اس عرصے میں مختلف نوعیت کی خلاف ورزیوں پر جاری کئے گئے چالانوں کی تعداد مقررہ اہداف کے قریب رہی، تاہم بعض کیٹیگریز میں ریکوری کی شرح اہداف سے کم بھی ریکارڈ کی گئی ہے۔ٹریفک حکام کے مطابق سال 2026 کی پہلی سہ ماہی کیلئے محکمے کو جو ریکوری ہدف دیا گیا تھا، اسکے تحت یومیہ اور ماہانہ بنیادوں پر چالانوں کی تعداد اور جرمانوں کی وصولی کا تخمینہ مقرر کیا گیا تھا۔ ذرائع کا کہنا ہے کہ جنوری اور فروری کے دوران ہیلمٹ نہ پہننے، سگنل کی خلاف ورزی، اوور سپیڈنگ اور بغیر لائسنس ڈرائیونگ پر سب سے زیادہ چالان کئے گئے۔اعداد و شمار کے جائزے سے ظاہر ہوتا ہے کہ چالانوں کی مجموعی تعداد تو مقررہ ہدف سے کچھ زیادہ رہی، تاہم جرمانوں کی مکمل وصولی کے معاملے میں سو فیصد نتائج حاصل نہیں ہو سکے۔ ای چالان سسٹم کے تحت بھیجے گئے متعدد نوٹس تاحال واجب الادا ہیں، جس کے باعث مجموعی ریکوری کی شرح ہدف سے کم رہی۔ حکام کے مطابق بعض شہری بروقت جرمانہ ادا نہیں کرتے یا قانونی چارہ جوئی کے ذریعے ادائیگی موخر کر دیتے ہیں جس سے ریکوری کا عمل سست پڑ جاتا ہے۔ٹریفک پولیس کا موقف ہے کہ ان کا بنیادی مقصد محض ریونیو اکٹھا کرنا نہیں بلکہ سڑکوں پر نظم و ضبط قائم کرنا اور حادثات میں کمی لانا ہے۔ ترجمان کے مطابق رواں سال حادثات کی شرح میں کمی لانے کیلئے خصوصی کریک ڈاون کئے گئے جن میں بغیر ہیلمٹ موٹر سائیکل سواروں اور کم عمر ڈرائیورز کے خلاف کارروائیاں شامل ہیں۔ ان کا کہنا تھا کہ جہاں چالانوں کی تعداد میں اضافہ ہوا ہے، وہیں شہریوں میں ٹریفک قوانین سے متعلق آگاہی بھی بڑھی ہے۔دوسری جانب شہری حلقوں کا کہنا ہے کہ بعض مقامات پر چالانوں کی شرح میں غیر معمولی اضافہ دیکھا گیا ہے، جس سے یہ تاثر پیدا ہوتا ہے کہ مقررہ اہداف پورے کرنے کیلئے کارروائیاں تیز کی جاتی ہیں تاہم ٹریفک پولیس اس تاثر کی تردید کرتی ہے اور کہتی ہے کہ تمام کارروائیاں میرٹ اور قانون کے مطابق کی جاتی ہیں۔ماہرین ٹریفک مینجمنٹ کے مطابق اگرچہ جرمانوں کی وصولی حکومتی ریونیو میں حصہ ڈالتی ہے، لیکن اصل کامیابی تب ہوگی جب خلاف ورزیوں کی شرح میں نمایاں کمی آئے۔ ان کا کہنا ہے کہ ریکوری کے اہداف مقرر کرنے کے بجائے حادثات میں کمی، ٹریفک بہاو¿ میں بہتری اور شہری شعور کو کارکردگی کا پیمانہ بنایا جانا چاہیے۔مجموعی طور پر جائزہ لیا جائے تو یکم جنوری 2026 سے اب تک چالانوں کی تعداد مقررہ ہدف کے برابر یا قدرے زیادہ رہی تاہم جرمانوں کی مکمل ریکوری کا ہدف ابھی پوری طرح حاصل نہیں ہو سکا جس کیلئے محکمہ نے فالو اپ مہم تیز کرنے کا عندیہ دیا ہے۔
رواں سال پہلے 2 ماہ میں لاکھوں گاڑیوں کے چالان، مقررہ ہدف حاصل ہونے کی امید
















