ریلوے پراپرٹی ،زمینی معاملات پر پبلک پرائیویٹ پارٹنرشپ ماڈل اختیار کئے جائیں،وزیراعظم


اسلام آباد:(بیورورپورٹ) وزیر اعظم شہبازشریف نے ریلوے کی بحالی ، اپ گریڈیشن پر وزیر ریلوے حنیف عباسی ،ٹیم کی ستائش کرتے ہوئے ہدایت کی پاکستان ریلوے خصوصاً علاقائی روابط ، بین الاقوامی ٹرین لنکس کے منصوبوں کیلئے عالمی معیار کے قانونی و معاشی ماہرین کی خدمات حاصل کی جائیں ،ریلوے پراپرٹی و زمینی معاملات پر پبلک پرائیویٹ پارٹنرشپ ماڈل اختیار کئے جائیں۔

اجلاس کی صدارت کرتے ہوئے شہبازشریف نے کہا ریلوے کا نظام کسی بھی ملک کی معیشت ، مواصلات کیلئے ریڑھ کی ہڈی کی حیثیت رکھتا ہے،ریلوے نظام کی بحالی کی طرف اٹھائے جانے والے اقدامات لائق تحسین ہیں،بین الاقوامی معیار کے قانونی و معاشی ماہرین کی خدمات حاصل کی جائیں۔

اجلاس کو بریفنگ دی گئی ریلوے نظام کی بحالی، ڈیجٹائزیشن ،آوٹ سورسنگ سے اربوں کا اضافی ریونیو متوقع ہے،ریلوے سٹیشنوں پر بینکوں کی اے ٹی ایم مشینیں نصب کی جارہی ہیں، جلد ہی مزید 11 ٹرینوں کو آوٹ سورس کیا جائےگا، 155ریلوے سٹیشنوں کو شمسی توانائی پر منتقل کیا جا چکا۔