حملہ قیامت کی گھڑی،پہلے دھماکہ پھر شدید فائرنگ کی گئی، مسافروں کی ر وداد

کوئٹہ:(بیورورپورٹ)حملہ قیامت کی گھڑی،پہلے دھماکہ ہوا، ٹرین رکتے ہی شدید فائرنگ کی گئی، جعفر ایکسپریس کے مسافروں نے آنکھوں دیکھا حال سنادیا۔

مسافر نے روداد سناتے ہوئے کہا حملے کے وقت ہر طرف چیخ و پکار تھی، سب جان بچانے کےلئے فرش پر لیٹ گئے پھر فائرنگ کےساتھ دھماکے ہوئے تو ٹرین رک گئی،دہشتگردوں نے کہا سب لوگ نیچے اتر جائیں، لوگ نہیں اتر رہے تھے لیکن میں اپنے بچوں کو لیکر اتر گیا، میں نے کہا جب کہہ رہے ہیں نیچے اترو تو پھر اتر جانا چاہئے ورنہ اندر آ کر بھی مارنا شروع کریں گے،نیچے اتر ے تودہشتگردوںنے مجھ سمیت میرے بچوں ،اہلیہ کو چھوڑ دیا، ساتھ کہا پیچھے مڑ کر نہیں دیکھنا۔

بازیابی پانے والے بزرگ مسافر نے کہادہشتگردوں کے کہنے پر بچوں کو اترنے کا کہا کیونکہ اندر میں بھی مرنا تھا اور باہر بھی پھر اتر گئے لیکن سب کو چھوڑ دیا گیا،سب لوگ چلتے چلتے قریب نہر میں گرے اور 4 گھنٹے مسلسل چلنے کے بعد محفوظ مقام پر پہنچے۔