گنڈا پور مستعفی ہوں،کرسی پر بیٹھے رہنا پشتونوں کےلئے نیک شگون نہیں،عظمیٰ بخاری

لاہور: (اپنے رپورٹر سے) وزیر اطلاعات پنجاب عظمیٰ بخاری نے کہا ہے گنڈا پور کو صوبے کے لوگوں کے مستقبل میں دلچسپی نہیں تو مستعفی ہوجائیں ویسے بھی ان کا کرسی پر بیٹھے رہنا پشتونوں کےلئے کوئی نیک شگون نہیں، تیسری بغاوت ناکام ہونے پر پشتون کارڈ کھیلنا قابل مذمت ہے۔

عظمیٰ بخاری نے کہا امن و امان کےلئے آل پارٹیز کانفرنس میں خیبرپختونخوا حکومت کا شرکت سے انکار شرمناک ہے جو جماعت 12 سال خیبرپختونخوا میں برسر اقتدار ہے اسے صوبے میں امن نہیں چاہیے،جب تمام تحریکیں اور تمام کارڈ پٹ گئے تو پشتون کارڈ کو لسانیت کے طور استعمال کیا جارہاہے، پشتونوں کے بچوں کو بانی پی ٹی آئی اور بشریٰ اپنے ناپاک عزائم کےلئے استعمال کر رہے ہیں، کے پی میں امن و امان کی صورتحال تشویشناک حد تک پہنچ گئی ، علی امین گنڈا پور کو صوبے میں قیام امن کےلئے تمام سٹیک ہولڈرز کو اکٹھا کرنا چاہیے تھا،وزیراعلیٰ کے پاس اڈیالہ جیل کے قیدی کی کال پر اسلام آباد پر حملہ آور ہونے کےلئے وقت اور وسائل ہیں لیکن پشتون قوم کے بہتر مستقبل کےلئے وقت ہی نہیں۔

وزیر اطلاعات نے کہا آئے روز دہشتگردی کے واقعات ہو رہے ہیں، فوج، پولیس اور دیگر سکیورٹی فورسز کے جوان وطن کے دفاع کےلئے اپنی جانوں کے نذرانے پیش کررہے ہیں، فتنہ پارٹی انہی سکیورٹی فورسز کےخلاف گھٹیا مہم چلانے میں مصروف ہے۔