حکومت کیخلاف پی ٹی آئی،جے یو آئی میں مفاہمت، مشترکہ معاملات پر کمیٹی تشکیل

اسلام آباد(بیورورپورٹ) حکومت کےخلاف مشترکہ جدوجہد کےلئے عمران خان اور مولانا فضل الرحمن کی قربت بڑھنے لگی، مشترکہ معاملات پر کمیٹی بنا دی گئی،پی ٹی آئی اور جمعیت علمائے اسلام کے مابین معاملات طے پانے لگے، سابق سیاسی حریف اور ایک دوسرے کو ٹف ٹائم دینے والے اب وفاقی اتحادی حکومت کےخلاف متحد ہونے کے انتہائی قریب پہنچ چکے ہیں،ذرائع کے مطابق مولانا فضل الرحمن کے تحفظات بانی چیئرمین پی ٹی آئی تک پہنچ گئے ہیں جس پر عمران خان نے سربراہ جے یو آئی کے تحفظات دور کرنے کی یقین دہانی کرا دی ہے جس کے بعد ان کا پیغام مولانا فضل ا لرحمن تک پہنچا دیا گیا ہے،بانی چیئرمین پی ٹی آئی نے مولانا فضل الرحمن سے مل کر معاملات طے کرنے کےلئے 3 رکنی کمیٹی تشکیل دینے کا کہہ دیا ہے، مذاکراتی کمیٹی کی سربراہی اسد قیصر کریں گے، کمیٹی متفقہ حکمت عملی طے کرے گی،ذرائع کے مطابق پی ٹی آئی اور جے یو آئی کے درمیان متفقہ حکمت عملی کےلئے احتجاجی تحریک سمیت دیگر نکات پر پہلے اتفاق رائے کیا جائے گا اور طے پانے کی صورت میں مولانا فضل الرحمن اور بانی چیئرمین پی ٹی آئی عمران خان دستخط کریں گے،کمیٹی کی تشکیل کے بعد مولانا فضل الرحمن اور اسد قیصر کے درمیان ٹیلی فونک رابطہ ہوا، مولانا فضل الرحمن اور تحریک انصاف کے وفد کے درمیان ملاقات طے ہوگئی، ملاقات آئندہ ہفتے مولانا فضل الرحمن کی رہائش گاہ پر ہوگی،ملاقات میں ملکی سیاسی صورتحال اور جے یو آئی (ف) سے اتحاد پر تبادلہ خیال ہوگا، گزشتہ ملاقات میں مولانا فضل الرحمن کی جانب سے اٹھائے تحفظات اور گارنٹی کے حوالے سے تحریک انصاف آگاہ کرے ۔