ممکنہ بارشیں، پیشگی حفاظتی وضروری انتظامی اقدامات یقینی بنائے جائیں،مریم نواز

لاہور: (اپنے رپورٹر سے،ہیلتھ رپورٹر)وزیر اعلیٰ پنجاب مریم نوازنے تیز برستی بارش میں ساملی سید حسین گورنمنٹ ٹی بی سینیٹوریم ہسپتال کادورہ کیا،مری، گلیات سمیت پورے ایریا میں مربوط ہیلتھ سسٹم قائم کرنے کا حکم دےدیا۔

مریم نواز نے پہاڑی علاقوں میں ایمرجنسی کی صورت مریضوں کی منتقلی کےلئے ہیلی پیڈ اور ایئر سٹریپ بنانے،مدر اینڈ چائلڈ بلاک فوری طور پرفنکشنل کرنے کی ہدایت کرتے ہوئے کہا ڈاکٹرز، سٹاف کی تعیناتی ،رہائشوں کےلئے فوری اقدامات کیے جائیں ۔

وزیر اعلیٰ مریم نواز نے ساملی ہسپتال میں جنرل وارڈز قائم کرنے اور جدید ترین کارڈیک بلاک قائم کرنے کی ہدایت کردی،سید حسین گورنمنٹ ٹی بی سینیٹوریم ہسپتال میں کینسر کے علاج کےلئے انکالوجی یونٹ بھی بنے گا، میڈیسن، سرجری، یورلوجی، آرتھو، آئی، ای این ٹی وارڈز بنیں گے۔

مریم نوازنے مری میں تحصیل ہیڈکوارٹراور ساملی ہسپتال میں مریضوں کی منتقلی کےلئے ٹرانسپورٹ فوری طور چلانے کی ہدایت بھی کردی، وزیر اعلیٰ نے او پی ڈی، وارڈ و دیگر شعبوں کا جائزہ لیا اور او پی ڈی میں لیڈی ڈاکٹر سے ہسپتال ،مریضوں کادریافت کیا،مریم نواز نے او پی ڈی میں موجوو خاتون کے بھائی کے فوری علاج کےلئے اقدامات کی ہدایت کرتے ہوئے کہامریض کی منتقلی کےلئے میرے ہیلی کاپٹر بھی چاہیے تو حاضر ہے۔

دریں اثناوزیر اعلیٰ پنجاب مریم نوازنے لاہور سمیت صوبے بھر میں بارشوں کے امکان پر پیشگی حفاظتی اور ضروری انتظامی اقدامات کا حکم دےدیا،مریم نواز نے کہا انتظامیہ ،واسا متحرک رہیں، نکاسی آب کےلئے تمام وسائل بروئے کار لائے جائیں،لاہور و دیگر شہروں میں ٹریفک رواں دواں رکھنے کیلئے تمام ضروری اقدامات کئے جائیں،نشیبی علاقوں سے بروقت محفوظ مقامات پر منتقلی کے اقدامات یقینی اورعوام کو صورتحال سے پیشگی خبردار کیا جائے۔