ڈرائنگ روم میں بیٹھ کر عہدے بانٹ لیا کریں الیکشن کرانے کی کیا ضرورت؟،سندھ ہائیکورٹ

کراچی:(بیورورپورٹ)چیف جسٹس سندھ ہائی کورٹ عقیل احمد عباسی نے ریمارکس دیئے ہیں ڈرائنگ روم میں بیٹھ کر عہدے بانٹ لیا کریں الیکشن کرانے کی کیا ضرورت ہے؟۔

عدالت عالیہ میں ملک میں انٹر نیٹ سروس بندش کیخلاف درخواستوں کی سماعت ہوئی، چیف جسٹس نے ریمارکس دیئے آپ انٹر نیٹ بند کردیتے ہیں، آپ نے لوگوں کو الیکشن لڑنے نہیں دیا، آپ لوگوں نے کسی کو بھی الیکشن مہم نہیں چلانے دی۔

چیف جسٹس سندھ ہائی کورٹ عقیل احمد عباسی نے سماعت کرتے ہوئے کہا ابھی تک نیٹ نہیں چل رہا ، ہائی کورٹ تک میں نہیں چل رہا ہے، نیٹ کب چلاﺅ گے؟درخواست گزار کے وکیل نے بتایا الیکشن کے دن انٹرنیٹ بند کر دیا گیا،پی ٹی اے کے وکیل نے دلائل دیتے ہوئے کہا پی ٹی اے وزارت داخلہ کے احکامات پر عمل کرتی ہے، وزارت اطلاعات اور وزارت داخلہ کے احکامات پر عمل درآمد کیا ہے،انٹیلی جنس اداروں کے رپورٹ پر انٹرنیٹ بند کیا گیا تھا۔

عدالت نے ریمارکس دیئے جمہوری عمل کو چلانے کےلئے کس چیز کے سکیورٹی خدشات ہیں؟ پی ٹی اے کے وکیل نے موقف دیا کہ ہمیں جو ہدایات ملی تھیں اس پر عمل درآمد کیا گیا،چیف جسٹس سندھ ہائی کورٹ عقیل احمد عباسی نے کہا عدالتی احکامات کو کیوں سنجیدہ نہیں لیا جاتا، جبران ناصر ایڈووکیٹ کی درخواست پر کیا جواب جمع کرایا ہے؟ کیا ہوتا ہے کیا نہیں ہوتا؟ ہم مخصوص ٹائم کا پوچھ رہے ہیں انٹر نیٹ کیوں بند کیا ایسے نہیں چلے گا، بہت ہو گیا تماشہ ،الیکشن کے دن انٹرنیٹ بند کرنے کی وجوہات بتائی جائیں۔