جواد سہراب ملک کی قطری وزیر داخلہ کو کامیاب فٹ بال ورلڈکپ پر مبارکباد

دوحہ (مشرق نیوز) معاون خصوصی جواد سہراب ملک نے قطر کے وزیر مملکت برائے داخلہ امور شیخ عبدالعزیز بن فیصل الثانی سے ملاقات کی۔ دونوں رہنماوں نے سیکورٹی کے شعبوں میں تعاون کا جائزہ لیا۔ وزیر اعظم کے معاون خصوصی برائے سمندر پار پاکستانیز اور ترقی انسانی وسائل جواد سہراب ملک اور وزیر مملکت برائے داخلہ قطر عبدالعزیز بن فیصل بن محمد الثانی کے درمیان ایک اہم ملاقات ہوئی۔ ملاقات میں دوطرفہ تعاون اور اقتصادی ترقی پر بات چیت ہوئی۔ ملاقات کے دوران معاون خصوصی نے قطر کے وزیر مملکت داخلہ کو فیفا ورلڈ کپ 2022 کی کامیاب میزبانی پر مبارکباد دی۔ انہوں نے ورلڈ کپ 2022 کی مثالی نوعیت اور اسکے اعلیٰ معیارات پر زور دیا جس نے دوسرے ممالک کیلئے پیروی کرنے کیلئے ایک معیار قائم کردی۔ معاون خصوصی نے قطر کے بنیادی ڈھانچے کی ترقی میں پاکستانی تارکین وطن کے اہم کردار پر روشنی ڈالی اور قطر کی اقتصادی جدید کاری میں مدد کیلئے انتہائی ہنر مند اور پیشہ ور افرادی قوت کی فراہمی جاری رکھنے کا ارادہ ظاہر کیا۔ قطر میں پاکستانی کارکنوں کی مسلسل نقل و حرکت کو یقینی بنانے کیلئے معاون خصوصی نے ابتدائی مرحلے میں پاکستان بھر میں بالخصوص پشاور اور لاہور میں اضافی قطر ویزہ سینٹرز (QVCs) کے قیام کی تجویز پیش کی۔ مزید برآں، معاون خصوصی نے غزہ تنازع کیلئے قطر کی انسانی ہمدردی کی کوششوں کی تعریف کی۔ قطر کے موقف کیلئے پاکستان کی حمایت کی تصدیق کی۔ انہوں نے وزیر مملکت داخلہ کو دورہ پاکستان کی دعوت بھی دی۔ قطر کے وزیر مملکت برائے داخلہ نے پاکستانیوں اور قطریوں کی مشترکہ اقدار پر زور دیتے ہوئے قطر کی ترقی میں پاکستانی تارکین وطن کے نمایاں کردار کا اعتراف کیا۔ انہوں نے دونوں ممالک کے درمیان تجارت، معیشت اور دفاعی تعاون میں دیرینہ تعلقات کو اجاگر کیا۔ QVCs کے بارے میں انہوں نے بتایا کہ تجویز زیر غور ہے اور پاکستان میں اضافی QVCs کے ممکنہ افتتاح کے تعین کیلئے ایک فزیبلٹی سٹڈی کی جاری ہے۔ مزید برآں، باہمی دلچسپی کے موضوعات اور سیکورٹی کے شعبوں میں تعاون کا جائزہ لینے کے ساتھ ساتھ ان کی حمایت اور ترقی کے طریقوں پر تبادلہ خیال کیا گیا۔ ملاقات کے دوران معاون خصوصی کے ساتھ قطر میں پاکستان کے سفیر اور کمیونٹی ویلفیئر اتاشی بھی موجود تھے۔