معیشت کو نقصان پہنچانے والے اقدامات کیخلاف ایکشن جاری رہے گا،آرمی چیف

کراچی(بیورورپورٹ)سربراہ پاک فوج جنرل سید عاصم منیر نے کہاہے معیشت کو نقصان پہنچانے والے اقدامات کےخلاف ایکشن جاری رہے گا۔

آرمی چیف جنرل سید عاصم منیر نے کراچی کا دورہ کیا اور نگراں وزیراعلیٰ سندھ جسٹس (ریٹائرڈ)مقبول باقر کے ساتھ صوبائی ایپکس کمیٹی کے اجلاس میں شرکت کی،اجلاس کے دوران نیشنل ایکشن پلان، کچے کے علاقے میں آپریشن، سی پیک منصوبوں پر کام کرنےوالے غیر ملکی شہریوں کی حفاظت، غیر قانونی مقیم غیر ملکیوں کی وطن واپسی، غیر ملکی کرنسی کو ریگولرائز کرنے کے اقدامات پر بریفنگ دی گئی۔

کراچی ٹرانسفارمیشن پلان، سندھ میں ایس آئی ایف سی کے اقدامات پر پیشرفت و گرین سندھ کے اقدامات بھی زیر غور آئے۔

سربراہ پاک فوج نے کہاقانون نافذ کرنےوالے ادارے و دیگر سرکاری محکمے غیر قانونی سرگرمیوں کےخلاف کارروائیوں کو پوری طاقت کےساتھ جاری رکھیں گے تاکہ وسائل کی چوری و سرگرمیوں کی وجہ سے ملک کو ہونےوالے معاشی نقصانات کو روکا جا سکے۔

جنرل عاصم منیر نے تاریخی اقدامات کے اثرات کےلئے تمام متعلقہ محکموں کے درمیان ہم آہنگی کی ضرورت پر زور دیا،شرکا نے اعادہ کیا ریاستی ادارے، سرکاری محکمے اور عوام صوبے کی ترقی و خوشحالی کےلئے متحد ہیں، قبل ازیں آرمی چیف کی آمد پر کور کمانڈر کراچی نے استقبال کیا۔