ترقیاتی سکیمیں روکنے کامعاملہ الیکشن کمیشن، حکومت سے اٹھائینگے،بلاول

کراچی (بیورورپورٹ)سابق وزیر خارجہ وچیئرمین پیپلز پارٹی بلاول بھٹو زرداری نے کہا ہے ترقیاتی سکیمیں روکنے کامعاملہ الیکشن کمیشن، صوبائی حکومت سے اٹھائیں گے، معاملہ حل نہ ہوا تو عدالت کا راستہ بھی جانتے ہیں۔

پریس کانفرنس کرتے ہوئے بلاول بھٹو نے کہاحکومت میں قانون سازی کی تھی ترقیاتی سکیمیں جاری رہیں گی، چاہتے ہیں وفاق و صوبوں میں سکیمز جاری رہیں، ترقیاتی سکیموں کو نہ روکا جائے، بلدیاتی نمائندے اپنی ذمہ داریوں کو پورا کریں۔

سابق وزیر خارجہ نے کہاکبھی کوئی سوکالڈ لیڈر ٹی وی پر حلقہ بندیوں کا کہتا ہے، کوئی موسم کی بات کرنا شروع کر دیتے ہیں، کوئی لیڈر کہتا ہے سکیورٹی کا مسئلہ ہے، عوام الیکشن سے بھاگنے والے لیڈروں کو پہچانتے ہیں،پیپلز پارٹی واحد جماعت جو الیکشن کےلئے تیار ہے۔

بلاول بھٹو نے کہاعوام کو روٹی، کپڑا، مکان کی سخت ضرورت ہے ، قوم کو پیپلز پارٹی سے امیدیں وابستہ ہیں، معاشرے میں تقسیم کا بحران ”نا تیرا نا میرا ہم سب کا پاکستان“ کے نعرے سے حل ہو سکتا ہے،بلدیاتی نمائندوں کو ہدایت کردی عوامی مسائل کا حل ترجیح ہے، کرپشن برداشت نہیں کروں گا، کرپشن سے عوام کا نقصان ہوتا ہے، تمام بحرانوں و مسائل کا حل پیپلز پارٹی کے منشور میں ہے،چیئرمین پی پی نے کہاپیپلز پارٹی چاہتی ہے الیکشن ہو اور آج ہو، حلقہ بندیاں ہوگئیں اب الیکشن کی تاریخ دینی چاہیے، الیکشن کی تاریخ کا اعلان ہونے تک چین سے نہیں بیٹھیں گے۔