فری سولر پینل سکیم لانچ ،عوام کو مہنگی بجلی سے مستقل ریلیف ملے گا،مریم نواز

لاہور :(اپنے رپورٹر سے)پنجاب میں ایک لاکھ صارفین کےلئے سی ایم پنجاب فری سولر پینل سکیم لانچنگ کر دی گئی،وزیراعلیٰ مریم نوازنے سی ایم پنجاب فری سولر پینل سکیم کا باقاعدہ افتتاح کردیا،پنجاب کے صارفین ایس ایم ایس یاآن لائن پورٹل پر گھر بیٹھے اپلائی کرسکتے ہیں۔

مریم نوازنے کہافری سولر پینل سکیم کا مقصد عوام کو مہنگی بجلی سے مستقل ریلیف ہے،فی یونٹ 14روپے سبسڈی سے پنجاب کے 73لاکھ صارفین مستفید ہوئے،وسائل عوام کی سہولت اور ریلیف کےلئے ہی خرچ ہوں گے۔

صوبائی سیکرٹری انرجی نے سی ایم پنجاب فری سولر پینل سکیم پر بریفنگ دیتے ہوئے کہا 100سے 200یونٹ ماہانہ بجلی صرف کرنےوالے صارفین کو 1100واٹ تک کا سولر سسٹم مفت ملے گا، سی ایم فری سولر پینل سکیم کی رجسٹریشن کیلئے پورٹل ”cmsolarscheme.punjab.gov.pk“ پر آن لائن اپلائی کیا جا سکتا ہے، سکیم میں شفافیت یقینی بنانے کےلئے کمپیوٹرائزڈ قرعہ اندازی کی جائے گی،فری سولر پینل حاصل کرنے والے صارفین کی معاونت او ررہنمائی کے لئے ہیلپ لائن بھی قائم کی جائے گی۔

دریں اثنا وزیر اعلیٰ پنجاب مریم نوازنے پی پی 139 سے ضمنی انتخاب جیتنے پر رانا طاہر اقبال کو مبارکباد یتے ہوئے کہاواضح اکثریت سے کامیابی عوام کی مسلم لیگ(ن) سے محبت اور بھرپوراعتماد کا ثبوت ہے، عوام جان چکے ہیں ترقی کا سفر نواز شریف کی قیادت میں ہی طے ہوگا۔

مزید بر آںمریم نواز نے میجر شبیر شریف شہیدکے 53ویں یوم شہادت پر خراج عقیدت پیش کرتے ہوئے کہامیجر شبیر شریف شہید عزم و جرات کی مثال بن کر زندہ ہیں،قوم دفاع وطن کیلئے جانوں کا نذرانہ پیش کرنےوالے جوانوں کی قربانیاں فراموش نہیں کر سکتی۔