عمران ،بشریٰ کی ناکام بغاوت کے تمام ثبوت سامنے آگئے،عظمیٰ بخاری

لاہور:(اپنے رپورٹر سے )وزیر اطلاعات پنجاب عظمیٰ بخاری نے کہا ہے عمران ،بشریٰ کی ناکام بغاوت کے تمام ثبوت سامنے آگئے،آئی جی اسلام آباد، سیکرٹری داخلہ اور ڈی پی او اٹک کی پریس کانفرنسز ناقابل تردید شواہد ہیں۔

اپنے بیان میں عظمیٰ بخاری نے کہاسکیورٹی فورسز پر حملوں کیلئے غیرملکیوں کو لایا گیا،احتجاج میں شریک افراد تربیت یافتہ و تخریب کاری کے ماہر تھے، گرفتار افراد کی اکثریت کا پاکستان میں کوئی ریکارڈ ہی نہیں، خیبر پختونخوا حکومت کے پاس دہشتگردوں سے لڑنے کیلئے اسلحہ نہیں لیکن فیڈریشن پر چڑھائی کیلئے جدید اسلحہ ہے۔

وزیر اطلاعات نے کہالاشوں کی سیاست کرنے والے اب تک درجن بھر بیانات تبدیل کر چکے ہیں،فتنہ پارٹی کا سوشل میڈیا اپنے لیے ہی وبال جان بن گیا، وقت آگیا پاکستان میں سوشل میڈیا کو ہر سطح پر ریگولرائز کیا جائے جنہوں نے انقلاب لانا تھا اب وہ ایک دوسرے پر ٹاﺅٹ اور جاسوس کے الزامات لگا رہے ہیں۔