جماعت اسلامی کے زیر اہتمام اسرائیلی سفاکیت کیخلاف شہر شہر احتجاج،ریلیاں

لاہور،اسلام آباد،کراچی،پشاور،کوئٹہ:(اپنے نمائندے سے،بیورورپورٹ)جماعت اسلامی کے زیر اہتمام اسرائیلی سفاکیت کیخلاف شہر شہر احتجاج،ریلیاں،فضادہشتگرد اسرائیل کے نعروں سے گونج اٹھی۔

اسلام آباد کے ڈی چوک پرسیو غزہ احتجاجی مظاہرے میں خواتین ،بچوں سمیت کارکنوں کی بڑی تعداد نے شرکت کی،مظاہرین ریلی پارلیمنٹ تک لے جانا چاہتے تھے پولیس نے روکدیا،کامیاب مذاکرات کے بعد شرکا پرامن انداز میں دوبارہ ڈی چوک پرآ کر منتشر ہوگئے۔

لاہورمیں جماعت اسلامی کے سیکرٹری جنرل امیرالعظیم کی قیادت میں مظاہرہ کیا گیا،شرکا مظلوم فلسطینیوں کی حمایت اوراسرائیل کےخلاف نعرے بازی کرتے رہے،امیر العظیم ودیگر نے خطاب کرتے ہوئے کہافلسطینی بھائیوں نے اسرائیل و امریکہ کے تمام نقشوں کو ملیا میٹ کردیا ، عالمی سامراج امریکہ کبھی عرب تو کبھی اسرائیل کا چہرہ آگے کرکے چھپتا ہے،دیگر شہروں میں بھی ریلیاں نکال کر فلسطینیوں سے بھرپور اظہار یکجہتی کیا گیا۔