نواز شریف ”عوام کی امید“مہنگائی کے اندھیروں،مایوسی کاخاتمہ کرینگے،مریم نواز

لاہور(اپنے رپورٹر سے)سینئر نائب صدر وچیف آرگنائزر ن لیگ مریم نواز نے نواز شریف کو ”عوام کی امید“ قرار دیتے ہوئے کہا ہے سابق وزیراعظم کے آنے سے مہنگائی کے اندھیروں ،مایوسی کا خاتمہ ہوگا۔

ن لیگ نے خیبرپختونخوا میں صوبائی، ڈویژن و ضلع کی سطح پر آرگنائزنگ کمیٹیوں کی تشکیل ،یوتھ کوآرڈینیٹرز کی تقرری کا مرحلہ مکمل کرلیا۔

اس موقع پر خطاب کرتے ہوئے مریم نواز نے کہا صوبے، ڈویژن، ضلع کے بعد اب تحصیل کی سطح پر یوتھ کوآرڈینیٹرز کی تقرری کا حتمی مرحلہ مکمل کرنے جارہے ہیں،خیبرپختونخوا کو مسلم لیگ (ن) کا قلعہ بنانا ہے، صوبے و عوام کو ترقی سے ہمکنار کریں گے، ترقی کا حق کے پی کو بھی ہے، 10 سال خیبر پختونخوا کے وسائل کو صرف لوٹا گیا، ہیلی کاپٹر سے نیچے پاوں نہ اتارا، نوجوان سیلاب کے پانیوں میں مدد کےلئے پکارتے رہے۔

سینئر نائب صدر ن لیگ نے مزید کہانواز شریف کی قیادت میں مہنگائی، بےروزگاری ،معاشی بدحالی کےخلاف اعلان جنگ کردیا ،نواز شریف کے ہوتے ہوئے عوام مایوس نہ ہوں،4 برس کی بربادی کو دوبارہ خوشحالی میں تبدیل کرنے کا عزم زندہ ہے۔