انصاف پسندی پہچان ،نیب مکمل غیر سیاسی رہے گا ،چیئرمین نیب

اسلام آباد (بیورورپورٹ) چیئرمین نیب لیفٹیننٹ جنرل (ر) نذیر احمد نے کہا ہے شائستگی، تہذیب اور انصاف پسندی نیب کی پہچان ہوگی ،نیب مکمل طور پر غیر سیاسی رہے گا اور قانون کے مطابق کام کرے گا۔


چیئر مین نیب نے نیب راولپنڈی کے دفتر میں عوام سے دھوکہ دہی کے مختلف فراڈ کیسز کے متاثرین میں معاوضے کے چیک تقسیم کرنے کی تقریب میں شرکت کی، چیئرمین نیب نے شرکا سے خطاب کے دوران اس بات کا اعادہ کیا نیب مکمل طور پر غیر سیاسی رہے گا اور قانون کے مطابق کام کرے گا،ماضی میں ادارہ مختلف تنازعات کا حصہ رہا جس کی وجہ سے اپنے اصل کام پر توجہ مرکوز نہ رکھ سکا ،ساکھ کو بھی نقصان پہنچا۔

جنرل (ر) نذیر احمد نے کہامقصد نیب کا منصفانہ و غیر جانبدار ادارہ کے طور پر امیج بحال کرنا ہے، چیئرمین نیب نے عالمی کرپشن انڈیکس میں ملک کی تنزلی پر تشویش کا اظہار کرتے ہوئے کہا کرپشن کے خاتمے کےلئے پورے معاشرے کو مل کر کام کرنا ہوگا،چیئرمین نیب نے عزم کیا اب کیسز قانون کے مطابق مقررہ معیاد کے مطابق نمٹائے جائیں گے۔