رجیم چینج کی کوشش پر اسرائیلی جوہری مرکز کو نشانہ بنائینگے: ایران کی دھمکی

تہران (مشرق نیوز) ایران نے خبردار کیا ہے کہ اگر اسرائیل اور امریکہ نے اسلامی جمہوریہ میں رجیم چینج کی کوشش کی تو اسرائیل کے جوہری مرکز دیمونا کو براہ راست نشانہ بنایا جائیگا۔ غیر ملکی خبر رساں ادارے نے نیم سرکاری خبر رساں ادارے کے حوالے سے خبر دی ہے کہ ایک اعلیٰ ایرانی فوجی عہدیدار نے کہا ہے کہ ایران کسی بھی بیرونی مداخلت یا حکومت گرانے کی سازش کا بھرپور اور فیصلہ کن جواب دیگا۔

عہدیدار کا کہنا تھا کہ ایسی صورت میں دیمونا نیوکلیئر ری ایکٹر ایران کے ممکنہ اہداف میں سرفہرست ہوگا۔ ایرانی اہلکار نے دعویٰ کیا کہ تہران کے پاس ایسے اہداف کو نشانہ بنانے کی مکمل صلاحیت موجود ہے اور اگر جنگ مسلط کی گئی تو اس کا دائرہ کار وسیع ہو سکتا ہے۔

بیان میں مزید کہا گیا کہ ایران اپنی خودمختاری اور نظام کے تحفظ کیلئے کسی بھی حد تک جا سکتا ہے۔