ایران کے تابڑ توڑ میزائل حملے، 10 اسرائیلی ہلاک، 200 سے زائد زخمی

تل ابیب (مشرق نیوز) ایران نے اسرائیل پر نیا حملہ کردیا جس کے بعد کئی اسرائیلی شہر سائرن کی آوازوں سے گونج اٹھے، حیفہ شہر میں کیے گئے حملوں کے نتیجے میں 10 اسرائیلی ہلاک اور 200 سے زائد زخمی ہوگئے۔ ایران کے سرکاری نشریاتی ادارے ’ارنا نیوز‘ کے مطابق ایران نے اسرائیل کے خلاف دوبارہ سے حملوں کا آغاز کردیا ہے۔

رپورٹ میں بتایا گیا کہ ایران نے اسرائیل پر 100 میزائل داغ دئیے جبکہ ہائیپر سانک اور بیلسٹک میزائلوں کے ٹکرانے پر اسرائیلی شہر حیفہ میں زوردار دھماکوں کی آوازیں سنی گئی ہیں۔ ایران کے تازہ حملے کے بعد اسرائیلی کے متعدد شہروں میں سائرن بجادئیے گئے جبکہ صہیونی فوج نے شہریوں کو ہدایت دی ہیں کہ وہ محفوظ ٹھکانوں سے باہر نہ نکلیں۔

اسرائیل کے چینل 13 نے ابتدائی رپورٹس میں بتایا ہے کہ ایرانی میزائلوں نے شمالی ساحلی شہر حیفہ اور پڑوسی قصبے تامر کو نشانہ بنایا ہے۔ٹائمز آف اسرائیل نے بھی تصدیق کی ہے کہ ایران کے میزائل حملوں میں 10 اسرائیلی ہلاک اور 200 سے زائد زخمی ہوگئے۔

ایک ایرانی بیلسٹک میزائل حیفہ کے مشرق میں شمالی شہر تامرا میں ایک 2 منزلہ عمارت سے ٹکرایا جس کے نتیجے میں ابتدائی طور پر صرف ایک شہری کی ہلاکت کی خبر آئی تھی جو بعد ازاں 4 تک پہنچ گئی اور ان حملوں میں 13 زخمی بھی ہوئے ہیں۔ بیت یام میں ایرانی میزائل حملے کے نتیجے میں 6 اسرائیلی ہلاک ہوگئے جبکہ کم ازکم 7 افراد لاپتہ ہیں جن کی تلاش جاری ہے۔

چینل 12 کے مطابق رات بھر ایرانی میزائل حملوں میں 200 سے زائد افراد زخمی ہوگئے۔قطری نشریاتی ادارے ’الجزیرہ‘ کی ایک رپورٹ میں سوشل میڈیا پر وائرل ویڈیو کی تصدیق کرتے ہوئے کہا گیا ہے کہ شمالی اسرائیل کے آسمان میں ایرانی کروز میزائل دکھائی دے رہے ہیں۔

ایران کے سپاہ پاسداران انقلاب اسلامی نے کہا ہے کہ اس کی ایرو اسپیس فورس نے اسرائیل پر میزائلوں اور ڈرونز کا ایک بڑا حملہ کیا ہے، جو فوجی آپریشن ’وعدہ صادق تھری‘ کا حصہ ہے۔پاسداران انقلاب کی جانب سے ٹیلی گرام پر جاری کئے گئے بیان میں کہا گیا کہ یہ حملے اسرائیلی حملوں کے جواب میں کئے گئے ہیں جس میں ڈرون حملے بھی کئے گئے ہیں، حملوں کے بعد حیفہ آئل ریفائنری میں آگ لگ گئی۔

پریس ٹی وی کی رپورٹ کے مطابق پاسداران انقلاب کے ترجمان بریگیڈیئر جنرل علی محمد نائینی نے ایک براہِ راست نشریاتی بیان میں کہا کہ صہیونی ریاست کی نئی جارحیت کے جواب میں جاری مشترکہ حملہ آور کارروائیوں کے سلسلے ’وعدہ صادق سوم‘ کے تحت اسرائیلی لڑاکا طیاروں کے ایندھن کی تیاری کے مراکز اور اس ریاست کے توانائی کی فراہمی مراکز کو بڑی تعداد میں ڈرونز اور میزائلوں سے نشانہ بنایا گیا ہے۔

انہوں نے مزید کہا کہ اگر جارحیت جاری رہی تو ایرانی مسلح افواج کی حملہ آور کارروائیاں مزید شدت اور بڑے پیمانے پر جاری رہیں گی۔ترجمان نے یہ بھی اعلان کیا کہ پاسداران انقلاب کے ایرو اسپیس ڈیفنس سسٹم نے کامیابی کے ساتھ اسرائیل کے 3 کروز میزائل، 10 ڈرونز اور درجنوں چھوٹے ڈرونز کو تباہ کر دیا ہے۔

واضح رہے کہ گزشتہ روز ایران نے جوابی کارروائی ”وعدہ صادق 3“ کا آغاز کرتے ہوئے اسرائیل کے مختلف مقامات پر میزائل حملے کئے تھے۔گزشتہ رات سے جاری حملوں میں اسرائیل کی کئی عمارتیں تباہ ہوگئیں جبکہ ان حملوں کے نتیجے میں خاتون سمیت 5 اسرائیلی شہری ہلاک اور 170 سے زائد زخمی ہوگئے۔گزشتہ روز ایران کی جانب سے تل ابیب میں اسرائیلی جوہری تحقیقی مرکز اور اسرائیلی ڈیفنس فورسز کے ہیڈکوارٹرز پر بھی میزائل حملہ کیا گیا۔