عظیم حریت لیڈر کی دوسری برسی،سید علی گیلانی نے کشمیریوں کے حقوق کیلئے انتھک جدوجہد کی: خالد مجید

جدہ(نمائندہ خصوصی) عظیم حریت لیڈر سید علی گیلانی کی دوسری برسی کے موقع پر قونصل جنرل پاکستان خالد مجید نے کہا ہے کہ سید علی گیلانی ہمت اور استقامت کا پیکر تھے۔ انہوں نے کشمیریوں کے حقوق کیلئے انتھک محنت کی۔ انکی قربانیاں اور غیر متزلزل عزم ہم سب کو ہمیشہ متاثر کرتا رہےگا۔ آج ہم بہادر کشمیری عوام کی قربانیوں کو خراج تحسین پیش کرتے ہوئے انکے ساتھ مکمل اظہار یکجہتی کرتے ہیں۔ ہمیں کشمیری آبادی کے خلاف جاری مظالم اور خلاف ورزیوں پر غور کرنا چاہیے اور جموں و کشمیر میں غیر قانونی قبضے کی واضح الفاظ میں مذمت کرنی چاہیے۔ حکومت پاکستان کشمیری عوام کی جدوجہد کی حمایت کیلئے اپنے غیر متزلزل عزم کا اعادہ کرتی ہے۔ ہم عالمی برادری سے مطالبہ کرتے ہیں کہ وہ دیرینہ تنازعہ کشمیر کو اقوام متحدہ کی قراردادوں کے مطابق حل کرنے میں اپنا کردار ادا کرے۔ ضروری ہے کہ کشمیری عوام کو ان کا بنیادی حق خود ارادیت دیا جائے۔ سید علی گیلانی کے متاثر کن الفاظ، ”ہم پاکستانی ہیں، پاکستان ہمارا ہے“ہمارے دل و دماغ میں ہمیشہ گونجتے رہیں گے۔ اج ہم اس عہد کی تجدید کرتے ہیں کہ ہم اپنے کشمیری بھائیوں اور بہنوں کے شانہ بشانہ ان کی جائز امنگوں کی وکالت کرنے کیلئے انتھک کاوشیں کریں گے اور ہر جائز ذریعہ بروئے کار لائیں گے۔ ہم سب کو مل کر ایک ایسے مستقبل کی طرف کام کرناہے جہاں کشمیری عوام اپنی تقدیر کا خود فیصلہ کر سکیں اور امن اور ہم آہنگی سے رہ سکیں۔ اللہ رب العزت سے دعا ہے کہ وہ سید علی گیلانی کے درجات بلند کرے اور ان کو جنت الفردوس میں اعلی مقام عطا فرمائے ۔ پاکستان زندہ باد! کشمیر بنے گا پاکستان!