لاہور (کرائم رپورٹر) انسپکٹر جنرل پولیس پنجاب ڈاکٹر عثمان انور نے کہا ہے کہ پولیس ملازمین اور انکے اہل خانہ کو درپیش مسائل کا بروقت ازالہ پنجاب پولیس کی اولین ترجیح ہے ، سپروائزری افسران اس سلسلے میں فوری اقدامات یقینی بناتے ہوئے کوئی کسر نہ اٹھا رکھیں ۔ آئی جی پنجا ب نے کہاکہ پیشہ ورانہ اموراور ویلفیئر سے متعلقہ درخواستوں کو فوری نمٹایا جائے اور اگر کسی درخواست پر سنٹرل پولیس آفس سے تعاون درکار ہو تو انہیں فوری طور پر سی پی او بھجوایا جائے ۔ ان خیالات کا اظہار انہوں نے گزشتہ روز سنٹرل پولیس آفس میں پولیس ملازمین اور انکے اہل خانہ سے ملاقات کے دوران کیا ، آئی جی پنجاب نے پولیس ملازمین کی پیش کردہ درخواستیں سن کر ریلیف بارے احکامات جاری کئے۔ دریں اثناءآئی جی پنجاب ڈاکٹر عثمان انور نے کہاکہ صوبے کی تمام ہائی ویز پر پی ایچ پی کی ٹیمیں عوام کی جان و مال کے تحفظ ، حادثات کی روک تھام ، ٹریفک کی ہموار روانی اور قوانین کی پاسداری کیلئے اپنے فرائض تندہی سے ادا کررہی ہیں ، آئی جی پنجاب نے ہدایت کی کہ پی ایچ پی ٹیمیں اپنے بیٹ ایریاز میں فیلڈ پٹرولنگ کو مزید موثر بنائیں ، قوانین کی خلاف ورزی ، جرائم کی روک تھام کے ساتھ ساتھ شہریوں کی مدد اور رہنمائی کیلئے ترجیحی بنیادوں پر اقدامات کیے جائیں۔ یہ ہدایات انہوں نے آج پنجاب ہائی وے پٹرول کی ماہانہ کارکردگی کا جائزہ لیتے ہوئے افسران کو جاری کیں ۔ پنجاب ہائی وے پٹرول ہیڈکوارٹرز نے ماہِ مئی 2024 کی کارکردگی رپورٹ جاری کر دی ہے ، تفصیلات کے مطابق پی ایچ پی نے شاہرات پر بذریعہ ای پولیس پوسٹ ایپ 3.14 ملین افراد کو چیک کیا، دورانِ چیکنگ 529 اشتہاری مجرمان/ عدالتی مفروران کو گرفتار کیا۔ پنجاب بھر کی شاہرات پر 1.60 ملین گاڑیوں کو چیک کیا گیا، 267 چوری شدہ گاڑیاں/ موٹر سائیکلیں برآمد کی گئیں ، روڈ سیفٹی مہم کے تحت ٹریفک قوانین کی خلاف ورزیوں پر 2 لاکھ 73 ہزار 8 سو 15 ای چالان کیے گئے۔ ایکسل لوڈ کی خلاف ورزی پر 1 لاکھ 32 ہزار 3 سو 05 اوور لوڈڈ گاڑیوں کے چالان کئے، جرمانے کی مد میں 112 ملین کی رقم خزانے میں جمع کروائی گئی۔ گیس سلنڈر کے غیر قانونی استعمال پر 1171 گاڑیوں کے خلاف قانونی کارروائی کی گئی ، شہریوں کی سہولت کے پیشِ نظر 11 ہزار 6 سو 62 ڈرائیونگ لائسنس جاری کیے گئے، 87 گمشدہ بچوں کو ان کے والدین سے ملوایا گیا، 651 عارضی و مستقل تجاوزات کو ختم کر کے ٹریفک کے بہا¶ کو بہتر بنایا گیا۔ 9347 مسافروں کو مختلف نوعیت کی مدد و راہنمائی فراہم کی گئی۔ پولیس خدمت مراکز پر 6060 شہریوں کو مختلف پولیسنگ خدمات فراہم کی گئیں۔ ناجائز اسلحہ کے استعمال پر 93 مقدمات درج، منشیات فروشوں سے 2003 لیٹر شراب، 55408 گرام چرس اور 2200 گرام افیون برآمد کی گئی ، آئی جی پنجاب ڈاکٹر عثمان انور کی بہترین کارکردگی پر پی ایچ پی کو شاباش دی اورٹریفک کی روانی، شہریوں کی خدمت و حفاظت کیلئے بھرپور محنت اور خلوص نیت سے فرائض سر انجام دئیے جائیں۔
پولیس ملازمین، اہل خانہ کے تمام مسائل کا بروقت ازالہ اوّلین ترجیح ہے :آئی جی پنجاب
















