جماعت اسلامی کا مینار پاکستان پر3روزہ اجتماع عام شروع

لاہور:(اپنے نمائندے سے )مینار پاکستان پر جماعت اسلامی کے 3 روزہ اجتماع عام کا آغاز ،ملک بھر سے خواتین اور بچوں سمیت ہزاروں افراد شریک ہیں۔

امیر جماعت اسلامی حافظ نعیم الرحمن نے افتتاحی سیشن سے خطاب کرتے ہوئے کہا حکمرانوں نے ابراہم کارڈ کا حصہ بننے کا سوچا تو عبرت کا نشان بنادیں گے، کشمیر پر سودے بازی بھی کسی صورت قبول نہیں ،مینارپاکستان کا دامن شرکا کےلئے چھوٹا پڑ گیا ،تاریخی اجتماع نہ صرف پاکستان کےلئے اتحاد کی علامت بلکہ عالمی سطح پر بھی امت مسلمہ کا نمائندہ ہے،بین الاقوامی سیشن میں 150 کے قریب غیرملکی مندوبین شریک ہوں گے۔

حافظ نعیم الرحمن نے کہا کوئی بھی سیاسی جماعت حتیٰ کہ حکومت بھی اتنا بڑا اجتماع نہیں کرسکتی، خاندانی اجارہ داری ،اسٹیبلشمنٹ کے اشاروں پر چلنے والی جماعت نہیں،ملک پر مافیاﺅں کا راج ختم کریں گے، پاکستان شہباز شریف، عمران خان، عاصم منیر یا آصف زرداری کا نام نہیں بلکہ 25 کروڑ عوام کا نام پاکستان ہے۔