متنازع پیکا ایکٹ کےخلاف ملک گیر یوم سیاہ،مظاہرے،ریلیاں

لاہور: (سٹاف رپورٹر)پاکستان فیڈرل یونین آف جرنلسٹس ( پی ایف یو جے)کی کال پر متنازع پیکا ایکٹ ترمیمی بل 2025 کےخلاف ملک بھر میں یوم سیاہ منایا گیا۔

پریس کلبز میں سیاہ پرچم لہرائے گئے ، پی ایف یو جے کی کال پر جوائنٹ ایکشن کمیٹی نے مظاہروں میں بھرپور شرکت کی ،پی بی اے، اے پی این ایس، ایمنڈ اور سی پی این ای کے قائدین نے بڑے شہروں میں پیکا کے ظالمانہ قانون کےخلاف خطاب بھی کیا۔

پی ایف یو جے کے سیکرٹری جنرل و صدر لاہور پریس کلب ارشد انصاری نے خطاب کرتے ہوئے کہا پیکا کالا قانون حکومتی اوچھا ہتھکنڈا ہے،جب صدر نے قانون پر دستخط کئے ہوں گے بھٹو اور بےنظیر شہید کی روحیں تڑپ رہی ہوں گی، پیپلزپارٹی تو شہدا کی پارٹی ہے لیکن اب صرف زرداری کا حصہ ہے، سب سیاسی جماعتیں کالے قانون کے حق میں تھیں اور پاس کردیا،پرویز مشرف و ضیا الحق آئے اور چلے گئے اب آپ کے گھر جانے کا وقت ٹھہر گیا،کالے قانون کو لاگو کریں گی تو حکومتیں چلی جائیں گی۔

ارشد انصاری نے کہا احتجاج کا سلسلہ جاری رہے گا سی پی این ای، پی بی اے سمیت تمام پریس کلبز پیکا کے خلاف ہیں، جوائنٹ ایکشن کمیٹی کا فیصلہ ہے جب تک کالا قانون ختم نہیں ہوگا خود چین سے بیٹھیں گے نہ بیٹھنے دیں گے،اسمبلیوں میں بائیکاٹ ہوں گے بڑا مارچ اسلام آباد سے سینٹ و قومی اسمبلی تک جائے گا، پیکا ایکٹ پر عدالتوں کا دروازہ بھی کھٹکھٹائیں گے۔

سیکرٹری پریس کلب زاہد عابد نے کہا ایک بار پھر لاہور پریس کلب میں احتجاج کرنے کی نوبت آ گئی،حکومتی ناعاقبت کی وجہ سے پیکا ایکٹ منظور کیاگیا،لگتا ہے حکومت کوگھر جانے کی جلدی ہے، حکومت ہوش کے ناخن لے، پیکا ایکٹ پر تحفظات کو دور کیاجائے کیونکہ اب کچے کے ڈاکو زیادہ محفوظ ہیںلیکن صحافی کا جرم ناقابل ضمانت ہوگا ۔