ٹریفک سگنلز جلد فعال کیے جائیں:کمشنر بہاولپور

بہاولپور:(قاسم بھٹی)کمشنر بہاولپور ڈویژن نادرچٹھہ کی زیر صدارت ٹریفک مینجمنٹ بارے اعلیٰ سطحی اجلاس ہوا جس میں انہوں نے شہر کی مصروف شاہرات پر اوور ہیڈ برج اور انڈر پاسز کی تعمیر کےلئے تجاویز طلب کرلیں، انہوں نے ہدایت کی شہر کے تمام ٹریفک سگنلز جلد از جلد فعال کیے جائیں، ٹریفک کے بلا تعطل بہاو کو کنٹرول کرنے کےلئے موثر حکمت عملی اختیار کی جائے اورٹریفک حادثات کی روک تھام کے دوررس اقدامات کیے جائیں۔

ٹریفک مینجمنٹ کے سلسلے میں اجلاس کمشنر آفس کے کمیٹی روم ہوا، اجلاس میں ریجنل پولیس آفیسر رائے بابر سعید، ڈپٹی کمشنر بہاول پور ظہیر انور جپہ، ایڈیشنل کمشنر جام آفتاب حسین، اسسٹنٹ کمشنر سٹی محمد عدیل خان، سیکرٹری ریجنل ٹرانسپورٹ اتھارٹی عروج فاطمہ، ڈپٹی ڈائریکٹر بہاولپور ڈیویلپمنٹ اتھارٹی موسی اشعرخان، ڈپٹی ڈائریکٹر انجینئرنگ بی ڈی اے افضل بیگ،ڈائریکٹر ایڈمن بی ڈی اے قذافی بن شکور،ڈی ایس پی ٹریفک ریاض سمیت متعلقہ محکموں کے افسران شریک ہوئے۔

کمشنرنادر چٹھہ نے ہدایت کی شہر کے مصروف چوراہوں کو کشادہ کرنے کے علاوہ سروس روڈ کو بہتر بنایا جائے، شہر میں ٹریفک کے مسائل کو حل کرنے اور سڑکوں پر ٹریفک رواں دواں رکھنے کےلئے مستقل اور پائیدار اقدامات کیے جائیں اور موثرٹریفک مینجمنٹ پالیسی وضع کی جائے۔