گھٹنے نہیں ٹیکیں گے، دہشتگردی پر قابو پانے کےلئے آخری حد تک جائینگے،سرفراز بگٹی

کراچی(بیورورپورٹ) نگراں وزیر داخلہ سرفراز بگٹی نے کہا ہے گھٹنے نہیں ٹیکیں گے، دہشتگردی پر قابو پانے کےلئے آخری حد تک جائینگے۔

پاکستان کوسٹ گارڈز ٹریننگ سینٹر میں ریکورٹس کی پاسنگ آوٹ پریڈ پر منعقدہ تقریب سے خطاب کرتے ہوئے سرفراز بگٹی نے کہا شہدا کی قربانیوں کو تاقیامت یاد رکھا جائے گا،تربیت ریکروٹس کےلئے سنگ میل ثابت ہوگی، بلوچستان کے امن میں کوسٹ گارڈز کا کلیدی کردار ہے،کوسٹ گارڈز نے ایک سال کے دوران بھاری مقدار میں منشیات پکڑی،بین الاقوامی مارکیٹ میں مالیت616ملین ڈالر ہے۔

دریں اثنا صحافیوں سے گفتگو کرتے ہوئے نگراں وزیر داخلہ سرفراز بگٹی نے کہا عام انتخابات سے قبل حلقہ بندیاں ہوں گی،الیکشن میں 2 ،4مہینے کے التوا کو تاخیر نہیں سمجھتا، بہت مختصر عرصے کےلئے آئے ہیں،ملکی سالمیت پر حملے کرنے والوں کامقابلہ کریں گے۔