آئی ٹی بل کی واپسی عوام کے آئینی حقوق کی فتح ہے ،پیپلز پارٹی

اسلام آباد:(بیورورپورٹ)پیپلز پارٹی کی رہنما سینیٹر پلوشہ خان نے کہا ہے آئی ٹی بل کی واپسی عوام کے آئینی حقوق کی فتح ہے ،دیر آید، درست آید حکومت نے بالآخر غلطی تسلیم کرکے متنازع بل واپس لے لیا۔

رکن قومی اسمبلی سحر کامران ،سید سبط الحیدر بخاری کے ہمراہ پریس کانفرنس کرتے ہوئے پلوشہ خان نے کہا صدر آصف زرداری ،چیئرمین پیپلز پارٹی بلاول بھٹو زرداری نے عوامی حقوق کے معاملے پر ایک لمحے کےلئے بھی سمجھوتہ نہیں کیا، قیادت نے مشکل وقت میں نہ صرف میرا ساتھ دیا بلکہ مکمل حوصلہ دیا عوامی حقوق کےلئے ڈٹ کر آواز اٹھائی جائے،پیپلز پارٹی ہمیشہ کی طرح آئندہ بھی عوام کے حقوق، ملکیت ، آئینی تحفظ کےلئے ہر فورم پر آواز بلند کرتی رہے گی۔

پلوشہ خان نے پمز میں پیش آنےوالے اندوہناک سانحہ پر گہرے دکھ و افسوس کا اظہار کرتے ہوئے کہا 14 معصوم بچوں کی جانیں چلی گئیں، خاندانوں خصوصاً ماوں کے دکھ کا کوئی مداوا نہیں ہو سکتا، سانحہ پمز کی انکوائری رپورٹ کو فوری پبلک کیا جائے۔