انگلینڈ کیخلاف آخری ٹیسٹ کیلئے سکواڈ میں شامل ہونے والے کھلاڑی کون ہیں؟

لاہور (مشرق نیوز) انگلینڈ کے خلاف سیریز کے تیسرے اور آخری ٹیسٹ کیلئے پاکستان نے 5 ایسے کھلاڑیوں کو سکواڈ میں شامل کیا ہے جنہوں نے اس سے قبل ٹیسٹ کرکٹ نہیں کھیلی۔ تفصیلات کے مطابق انگلینڈ کو تین میچوں کی سیریز میں 0-2 کی فیصلہ کن برتری حاصل ہے تاہم پاکستان ٹیم میں نئے کھلاڑیوں کی شمولیت نے خاصی توجہ حاصل کی ہے۔

عرفات منہاس:
بائیں ہاتھ کے سپن آل راونڈر عرفات منہاس 3 ون ڈے اور 4 ٹی ٹونٹی انٹرنیشنل کھیل چکے ہیں۔ وہ آسٹریلیا کے خلاف ون ڈے ڈیبیو پر 5 وکٹیں لینے والے پاکستان کے پہلے بولر ہیں۔ 17 فرسٹ کلاس میچز میں انہوں نے 684 رنز بنائے اور 13 وکٹیں حاصل کی ہیں۔

سعد بیگ:
کراچی کے وکٹ کیپر بیٹر سعد بیگ نے قائداعظم ٹرافی میں شاندار کارکردگی دکھاتے ہوئے 1000 رنز بنائے اور پلیئر آف دی ٹورنامنٹ قرار پائے۔ گزشتہ سیزن میں انہوں نے مجموعی طور پر 1369 رنز کے ساتھ وکٹوں کے پیچھے 56 شکار کئے۔

عمران جونیئر:
سوات سے تعلق رکھنے والے بائیں ہاتھ کے فاسٹ بولر نے 8 فرسٹ کلاس میچز میں 23 وکٹیں حاصل کی ہیں۔وہ پاکستان شاہینز کے ساتھ بھی دورے کر چکے ہیں اور حال ہی میں این سی اے کے فاسٹ بولنگ کیمپ میں شریک ہوئے۔

رضا اللہ:
21 سالہ دائیں ہاتھ کے فاسٹ بولر نے 8 فرسٹ کلاس میچز میں 30 وکٹیں حاصل کی ہیں۔ وہ بیٹنگ میں بھی کارآمد ثابت ہوسکتے ہیں اور پی ایس ایل میں راولپنڈیز کی نمائندگی کر چکے ہیں۔

عمران رندھاوا:
58 فرسٹ کلاس میچز کا تجربہ رکھنے والے عمران رندھاوا 110 وکٹیں حاصل کر چکے ہیں۔ وہ بیٹنگ میں بھی صلاحیت رکھتے ہیں اور حالیہ پی ایس ایل میں ملتان سلطانز کا حصہ تھے۔