پنجاب حکومت اخلاقی و ذہنی پستی کی شکار، رویہ غیر جمہوری ہے: وزیر اعلیٰ خیبرپختونخواہ

پشاور (بیورو رپورٹ) وزیراعلیٰ خیبر پختونخوا سہیل آفریدی نے کہا ہے پنجاب حکومت اخلاقی و ذہنی پستی کی شکار، رویہ غیر جمہوری اور قابل مذمت ہے،پشاور میں صوبائی کابینہ اجلاس سے خطاب میں سہیل آفریدی نے پنجاب کے 3 روزہ دورے کے دوران صوبائی حکومت کے رویے پر سخت تحفظات کا اظہار کیا،خیبر پختونخوا کابینہ کے روبرو سہیل آفریدی نے کہا پنجاب حکومت کا رویہ غیرجمہوری اور قابل مذمت ہے، صوبائی حکومت نے کابینہ ارکان کو تشدد کا نشانہ بنایا ہے،ایک صوبے کے منتخب وزیراعلیٰ کےلئے مسلسل راستے اور بازاروں کو زبردستی بند کرایا گیا، پنجاب پولیس کی جانب سے موٹروے پر ریسٹ ایریاز بھی بند کرائے گئے، مزار اقبال پر حاضری کے دوران لائٹس بند کرائے گئے، پنجاب حکومت اخلاقی اور ذہنی پستی کا شکار ہے، ملک میں معاشی و سیاسی عدم استحکام کے دوران ایسا رویہ تشویشناک اور ناقابل فہم ہے، قومی یکجہتی کے وقت نفرت آمیز رویے ملک کےلیے نقصان دہ ہیں،سہیل آفریدی نے کہا خیبر پختونخوا حکومت پنجاب حکومت کے رویے کی شدید مذمت کرتی ہے اور تمام سرکاری افسران کو واضح ہدایت دیتی ہے وہ دیگر صوبوں سے آنے والے سرکاری وفود کی روایات اور استطاعت سے بڑھ کر خدمت کی جائے، خیبر پختونخوا میں کسی کو اجنبیت محسوس نہ ہو،دوسری جانب وزیراعلیٰ خیبر پختونخوا سہیل آفریدی نے پنجاب کی وزیراعلیٰ مریم نواز کو خط لکھ دیا،خط میں کہا گیا جو ہوا وہ انتظامی خامی تھی نہ ہی حادثاتی بلکہ آئینی عہدہ اور بین الصوبائی عزت کو خراب کیا گیا، جو کچھ بھی میرے ساتھ ہوا وہ کسی بھی طور پر ایک عوامی نمائندہ کے شایان شان نہیں تھا، میرے دورے کے دوران جس انداز میں معاملات کو ڈیل کیا گیا وہ کوتاہی نہیں بلکہ جان بوجھ کر کیا گیا، میں نے 4کروڑ لوگوں کے نمائندے کی حیثیت سے لاہور کا دورہ کیا، مارکیٹیں اور عوامی مقامات کو بند کرکے لاہور کے شہریوں کو تکلیف دی گئی، موٹر وے ریسٹ ایریا تک بند رکھا گیا، میرے دورہ سے متعلق میرے خلاف سوشل میڈیا پر مہم چلائی گئی،سہیل آفریدی نے کہا یہ سب منشیات سمگلنگ تک سے جوڑا گیا اوریہ پنجاب حکومت کی زیر نگرانی ہوا، ایسے رویے اور انداز سے میری شخصیت کو تباہ کرنے کی کوشش کی گئی، جسے کسی بھی طور نظر انداز نہیں کیا جا سکتا،انتظامی طور پر ایسے حربے استعمال کیے گئے جن کا مقصد تضحیک کرنا تھا، ایسے طریقوں سے ریاستی یونٹس میں ہم آہنگی کو ختم کرنے کی کوشش کی گئی، میں خط کے ذریعے اس انداز اور طور طریقوں پر بھرپور احتجاج کرتا ہوں، توقع رکھتا ہوں کہ ان کا ازالہ کرتے ہوئے مستقبل میں ان سے اجتناب برتا جائے گا۔