پاکستان،بنگلہ دیش تعلقات میں مثبت پیشرفت خوش آئند،تعاون کو فروغ دینگے،عطا تارڑ

اسلام آباد:(بیورورپورٹ)وزیر اطلاعات عطاتارڑ نے پاکستان ، بنگلہ دیش کے درمیان دوطرفہ تعلقات میں مثبت پیشرفت کا خیرمقدم کرتے ہوئے کہا دونوں ممالک تاریخی روابط ،انتظامی و گورننس کے مشترکہ ورثے کے حامل ہیں،ان خیالا ت کااظہار انہوں نے بنگلہ دیش کے سینئر سول سروس افسروں پر مشتمل وفد سے گفتگو کرتے ہوئے کیا۔

ملاقات میں باہمی دلچسپی کے امور، گورننس کے نظام، انتظامی اصلاحات ، ادارہ جاتی استعداد کار میں بہتری سمیت مختلف پہلوﺅں پر تبادلہ خیال کیا گیا،وزیراعظم کے معاون خصوصی طارق فاطمی، وفاقی سیکرٹری اطلاعات اشفاق احمد خلیل و دیگر موقع پر موجود تھے۔

عطا تار ڑنے کہا دونوں ممالک کے دوطرفہ تعلقات میں مثبت پیشرفت کا خیرمقدم کرتے ہیں ایسے روابط باہمی اعتماد و تعمیری تعاون کو مزید فروغ دیں گے،پاکستان دوست ممالک کے ساتھ ادارہ جاتی تعاون اور تجربات کے تبادلے کو خصوصی اہمیت دیتا ہے،وزیر اطلاعات نے تربیتی و استعداد کار بڑھانے والے اداروں کے درمیان تعاون، فیکلٹی ایکسچینج، مشترکہ تحقیق اور تربیتی ماڈیولز کی تیاری کو مزید فروغ دینے کی ضرورت پر زور دیا۔