بحریہ نے کمبائنڈ ٹاسک فورس150 کی 13ویں بار کمان سنبھال لی

راولپنڈی: (بیورورپورٹ) پاک بحریہ نے کمبائنڈ ٹاسک فورس150 کی کمان 13ویں مرتبہ سنبھال لی۔

تبدیلی کمان کی تقریب بحرین میں واقع US NAVCENT کے ہیڈکوارٹرز میں ہوئی، پاک بحریہ کے کموڈور عاصم سہیل ملک کمبائنڈ ٹاسک فورس150 کے نئے کمانڈر تعینات ہوئے،آئی ایس پی آر کے مطابق اس سے پہلے یہ کمان کینیڈین نیوی کے پاس تھی، کمبائنڈ ٹاسک فورس150 کا مشن سمندر میں غیر قانونی سرگرمیوں کا مقابلہ کرنے کےلئے میری ٹائم سکیورٹی کو فروغ دینا ہے۔

کموڈور عاصم سہیل ملک نے کہا خطے میں امن و استحکام کیلئے پاک بحریہ دیگر ممالک کی بحری افواج کےساتھ مل کر کام کرتی رہے گی، CTF150 کے زیر نگرانی علاقہ دنیا کے چند پیچیدہ اور اہم بین الاقوامی پانیوں پر مشتمل ہے،کمبائنڈ ٹاسک فورس150 کی 13ویں بار کمان کی ذمہ داری دراصل شراکت دار بحری افواج کی جانب سے پاک بحریہ پراعتماد کی مظہر ہے،قبل ازیں تبدیلی کمان کی تقریب میں پاکستان اور کینیڈا کے سفیروں، کمانڈر کمبائنڈ میری ٹائم فورسز، کمانڈر رائل بحرین نیوی اور کمبائنڈ میری ٹائم فورسز کی دیگر بحری افواج کے نمائندگان نے شرکت کی۔