ملک تباہی کے کنارے کھڑا ہے،ججز خدا کے واسطے متحد ہوجائیں،عمران خان

لاہور (خبر نگار)سابق وزیراعظم وچیئرمین پی ٹی آئی عمران خان نے کہاہے ملک تباہی کے کنارے کھڑا ہے،ججز خدا کے واسطے متحد ہوجائیں،حکمرانوں نے آئین کو ختم کیا تو جنگل کا قانون ہوگا، قوم کی طرف سے کہتا ہوں سپریم کورٹ ذاتی لڑائیوں کو تھوڑی دیر پیچھے چھوڑ دے،14 مئی تک قومی اسمبلی تحلیل کریں، ملک میں ایک دن انتخابات کی شرط مان لیں گے۔

کارکنوں سے ویڈیو لنک خطاب کرتے ہوئے عمران خان نے کہا چوروں نے اقتدار میں آکرادارے تباہ کر دیئے، 9لاکھ پاکستانی ملک چھوڑ کر چلے گئے، پرویز الٰہی کے گھر چادر و چار دیواری کے تقدس کو پامال کیا گیا،عوام کی امید ختم ہوگئی تو سنبھالے نہیں جائیں گے، میں ڈرا نہیں رہا سمجھا رہا ہوں۔

عمران خان نے مزید کہارات کو 12بجے عدالت کھلنے پر تکلیف ہوئی، رات کو عدالت کھلنے کے علاوہ میں نے کبھی عدالتوں پر تنقید نہیں کی، ہمیشہ فیصلوں کا احترام کیا جس قوم میں انصاف نہیں ہوتا وہ آزاد نہیں ہوتی، پہلے مجھے کہتے تھے اگر الیکشن چاہئیں تو اسمبلیوں کو تحلیل کریں جب اسمبلیاں تحلیل کیں تو اب بہانے لگا رہے ہیں،قانونی ماہرین نے کہا اسمبلیوں کی تحلیل کے بعد 90 دن کے اندر الیکشن ہوں گے، حکمران بھول جاتے ہیں سوشل میڈیا کا دور ہے، سوشل میڈیا پر آدھے گھنٹے میں جھوٹ پکڑا جاتا ہے۔

نواز شریف، شاہد خاقان عباسی پہلے کہتے تھے ایک دن الیکشن میں تاخیر نہیں ہو سکتی، الیکشن نہیں ہوں گے تو آرٹیکل 6 لگے گا اب 90 دن ہو گئے اور الیکشن نہیں ہو رہا،12 جماعتیں اسمبلی میں کہہ رہی ہیں الیکشن نہیں ہوں گے، افسوس ہینڈلرز پیچھے کھڑے ہو گئے ، الیکشن سے بھاگنے کیلئے لڑائیاں کرا رہے ہیں، پرویز الٰہی کے گھر کا بکتر بند گاڑی سے دروازہ توڑا گیا، کسی مہذب معاشرے میں ایسا نہیں ہو سکتا،صرف سپریم کورٹ سے انصاف کی امید ہے۔