سوشل میڈیا سٹار احمد شاہ کے چھوٹے بھائی انتقال کرگئے

پشاور (مشرق نیوز) پاکستان کے معروف ننھے سوشل میڈیا سٹار احمد شاہ کے چھوٹے بھائی عمر شاہ انتقال کرگئے۔یہ افسوسناک خبر احمد شاہ نے اپنے سوشل میڈیا اکاونٹس پر شیئر کرتے ہوئے مداحوں کو اطلاع دی۔ پوسٹ میں لکھا گیا ”ہمارے خاندان کا ننھا چمکتا ستارہ عمر شاہ خالق حقیقی سے جا ملا۔“ ساتھ ہی مداحوں سے انکی مغفرت اور اہل خانہ کیلئے صبر کی دعا کی درخواست بھی کی گئی۔

عمر شاہ اپنی معصوم مسکراہٹ اور شرارتی طبیعت کے باعث مداحوں میں بے حد مقبول تھے۔ وہ اکثر اپنے بڑے بھائی احمد شاہ کے ساتھ ویڈیوز اور ٹی وی پروگرامز میں دکھائی دیتے تھے، خصوصاً رمضان ٹرانسمیشن کے دوران ان کی موجودگی ناظرین کو بہت پسند آتی تھی۔ پیر کی صبح احمد شاہ کے تصدیق شدہ فیس بک اکاونٹ سے بھی ان کے انتقال کی خبر دی گئی تاہم موت کی وجہ بیان نہیں کی گئی۔

واضح رہے کہ گزشتہ برس جولائی میں عمر شاہ کی آنکھوں کی موتیا سرجری ہوئی تھی تاہم ان کے انتقال کی اصل وجہ سامنے نہیں آ سکی۔ اچانک وفات کی یہ خبر احمد شاہ کے خاندان کے ساتھ ساتھ ان کے لاکھوں چاہنے والوں کیلئے بھی صدمے کا باعث بنی ہے۔