چائنہ فلم فیسٹیول پاکستانی فلم انڈسٹری کیلئے تازہ ہوا کا جھونکا ہے، عظمیٰ بخاری

لاہور: (اپنے نمائندے سے) وزیر اطلاعات پنجاب عظمیٰ بخاری نے کہا ہے لاہور میں چائنہ فلم فیسٹیول پاکستانی فلم انڈسٹری کےلئے تازہ ہوا کا جھونکا ہے۔

عظمیٰ بخاری نے چائنہ فلم فیسٹیول میں شرکت کی، چینی قونصل جنرل نے خوش آمدید کہا،فیسٹیول میں سیکرٹری انفارمیشن طاہر رضا ہمدانی اور چیئرمین الحمرا آرٹس کونسل رضی احمد نے بھی شرکت کی۔

وزیر اطلاعات نے کہاچین کی پاکستان کے دیگر شعبوں کی طرح فلم انڈسٹری میں شراکت داری قابل تحسین ہے، پاکستان ،چین چاہیں تو مشترکہ طور پر فلم و کلچر کے شعبوں میں بڑے پیمانے پر کام کر سکتے ہیں،پنجاب حکومت نے فلم انڈسٹری کے ریوائیول کےلئے 8 رکنی کمیٹی تشکیل دےدی ، حکومت دیگر شعبوں کی طرح فلم انڈسٹری کو بھی ترقی کرتے دیکھنا چاہتی ہے۔

عظمیٰ بخاری نے کہا فلم انڈسٹری کےلئے گرانٹ وزیراعلیٰ پنجاب مریم نواز کا کلچر شعبے میں دلچسپی کا اظہار ہے، پاکستان ، چین ملکر فیچر ،اینیمیشن فلمیں بنا سکتے ہیں،لاہور ،بیجنگ میں نئے ٹیلنٹ، اداکاروں، پروڈیوسرز اور تکنیکی ماہرین کی مشترکہ ورکشاپس کا انعقاد کریں گے، لاہور ، شنگھائی میں مشترکہ فلم فیسٹیول کا انعقاد کیا جائے گا، دونوں ملکوں کے لوگ بھی ایک دوسرے کے قریب آئیں گے۔