دہشت گردی کیخلاف جنگ جاری رہے گی: فیلڈ مارشل سید عاصم منیر

راولپنڈی (مشرق نیوز) چیف آف ڈیفنس فورسز فیلڈ مارشل عاصم منیر نے کہا ہے کہ دہشت گردی کے خلاف جنگ پوری قومی قوت کے ساتھ جاری رہے گی۔ آئی ایس پی آر کے مطابق جنرل ہیڈکوارٹرز راولپنڈی میں پاک فوج کے افسران اور جوانوں کو عسکری اعزازات دینے کی ایک پروقار تقریب تقسیم اسناد منعقد ہوئی۔

فیلڈ مارشل سید عاصم منیر نے بطور مہمانِ خصوصی تقریب میں شرکت کی اور شہداءکے اہل خانہ، افسران اور جوانوں کو آپریشنز میں غیر معمولی بہادری اور ملک کیلئے نمایاں خدمات کے اعتراف میں اعزازات سے نوازا۔ پروقار تقریب میں 50 ستارہ امتیاز (ملٹری) اور 12 تمغہ بسالت عطا کئے گئے، بعد از شہادت دئیے جانے والے تمغے شہداءکے اہل خانہ نے بڑے وقار اور عزت کے ساتھ وصول کئے۔

شہدا اور غازیوں کو خراجِ عقیدت پیش کرتے ہوئے فیلڈ مارشل نے کہاکہ شہدا اور غازی قوم کا دائمی فخر ہیں، ان کی عزت اور قربانی ہر پاکستانی کیلئے ایک مقدس امانت ہے، ہمارے وطن کا امن اور سلامتی انہی کی عظیم قربانیوں اور فرض سے بے لوث وابستگی کا نتیجہ ہے۔ فیلڈ مارشل نے شہدا کے اہل خانہ کی استقامت، وقار اور ثابت قدمی کو بھی زبردست خراج تحسین پیش کیا اور وطن سے ان کی بے مثال قربانیوں اور غیر متزلزل وابستگی کو سراہا۔

چیف آف ڈیفنس فورسز نے پاک فوج اور قانون نافذ کرنے والے اداروں کی عملی تیاری اور غیر متزلزل عزم کو سراہتے ہوئے دہشت گردوں کے خلاف انکی مسلسل کوششوں کی تعریف کی، اس عزم کا اعادہ کیا کہ ملک بھر میں پائیدار امن اور استحکام کے حصول تک دہشت گردی کے خلاف جنگ پوری قومی قوت کے ساتھ جاری رہے گی۔