کوئٹہ (مشرق نیوز) بلوچستان کے اضلاع قلات اور گوادر میں سکیورٹی فورسز کے انٹیلی جنس کی بنیاد پر آپریشنز کے دوران فتنہ الہندستان کے 4 دہشت گرد جہنم واصل ہوگئے، جبکہ ضلع گوادر کی تحصیل پسنی میں کلیئرنس آپریشن کے دوران دیسی ساختہ بم کے دھماکے میں پاک فوج کے میجر وجاہت وحید نے جام شہادت نوش کرلیا۔
پاک فوج کے شعبہ تعلقات عامہ کے مطابق انٹیلی جنس اداروں نے ضلع قلات کے علاقے جٹک آباد اور ضلع گوادر کی تحصیل پسنی کے علاقے شادی کور میں بھارتی سرپرستی میں کام کرنے والے فتنہ الہندوستان کے متعدد ٹھکانوں کی موجودگی کی اطلاع دی تھی جو مقامی آبادی کیلئے خطرہ تھے۔
آئی ایس پی آر کے مطابق 18 اکتوبر 2026 کو سکیورٹی فورسز نے قلات کے علاقے جٹک آباد میں انٹیلی جنس کی بنیاد پر آپریشن کیا۔ کارروائی کے دوران دہشت گردوں کے ٹھکانے کو مو¿ثر انداز میں نشانہ بنایا گیا اور شدید فائرنگ کے تبادلے کے بعد 4 دہشت گرد ہلاک کردیے گئے۔ علاقے سے اسلحہ اور گولہ بارود کا بڑا ذخیرہ بھی برآمد ہوا۔
ترجمان پاک فوج کے مطابق ضلع گوادر کی تحصیل پسنی کے علاقے شادی کور میں دہشت گردوں کے خاتمے اور علاقے کو محفوظ بنانے کیلئے کلیئرنس آپریشن جاری تھا کہ اس دوران سیکیورٹی فورسز کے دستے کو دیسی ساختہ دھماکہ خیز مواد (آئی ای ڈی) سے نشانہ بنایا گیا۔
دھماکے کے نتیجے میں دستے کی قیادت کرنے والے میجر وجاہت وحید شہید ہوگئے۔ 34 سالہ میجر وجاہت وحید کا تعلق لاہور سے تھا۔ انہوں نے فرض کی ادائیگی کے دوران مادر وطن کے دفاع میں جان قربان کردی۔ آئی ایس پی آر کا کہنا ہے کہ علاقے میں موجود دیگر دہشت گردوں کے خاتمے کیلئے کلیئرنس اور سینیٹائزیشن آپریشنز جاری رہیں گے۔
ترجمان پاک فوج نے مزید کہا کہ نیشنل ایکشن پلان پر وفاقی ایپکس کمیٹی کے منظور کردہ وژن ’عزم استحکام‘ کے تحت دہشت گردی کے خلاف کارروائیاں پوری قوت سے جاری رہیں گی۔ سکیورٹی فورسز اور قانون نافذ کرنے والے ادارے ملک سے غیر ملکی سرپرستی میں ہونے والی دہشت گردی کے خاتمے کیلئے پ±رعزم ہیں۔
وزیراعظم شہباز شریف نے بلوچستان کے علاقوں ضلع قلات اور گوادر میں خوارج کے خلاف کامیاب آپریشنز میں 4 بھارتی سرپرستی یافتہ دہشت گرد جہنم واصل کرنے پر سیکیورٹی فورسز کو زبردست خراج تحسین پیش کیا ہے۔
شہباز شریف نے پسنی میں آئی ای ڈی دھماکے میں جام شہادت نوش کرنے پر 34 سالہ میجر وجاہت وحید شہید کو زبردست خراجِ عقیدت پیش کرتے ہوئے کہا کہ ?میجر وجاہت وحید نے وطنِ عزیز کی حفاظت کیلئے اپنی جان کا نذرانہ پیش کیا، قوم کو اپنے اس بہادر سپوت پر فخر ہے۔
انہوں نے شہید میجر کے اہل خانہ سے دلی ہمدردی کا اظہار اور درجات کی بلندی کیلئے دعا بھی کی۔ وزیراعطم نے اپیکس کمیٹی کے وڑن ’عزمِ استحکام‘کے تحت غیر ملکی سرپرستی یافتہ دہشت گردی کے مکمل خاتمے تک جنگ جاری رکھنے کا عزم کا اعادہ کیا۔
قلات ، گوادر ، 4 دہشت گرد ہلاک، پاک فوج کا ایک میجر بھی شہید
