وزیراعظم شہباز شریف چین کے چار روزہ دورے پر روانہ

اسلام آباد (مشرق نیوز) وزیراعظم شہباز شریف چین کے چار روزہ دورہ کے پہلے مرحلے میں ہانگژو روانہ ہو گئے۔نائب وزیراعظم و وزیر خارجہ سینیٹر اسحاق ڈار، وزیر منصوبہ بندی احسن اقبال، وزیرِ اطلاعات و نشریات عطاءاللہ تارڑ، وزیر آئی ٹی شزہ فاطمہ خواجہ اور معاون خصوصی طارق فاطمی وزیر اعظم کے ہمراہ ہیں۔

وزیر اعظم ہانگژو میں ژجیانگ صوبے کے پارٹی سیکرٹری سے ملاقات کریں گے، سی پیک فیز 2 کے تحت پاکستانی اور چینی کمپنیوں کے مابین تعاون کے فروغ کیلئے منعقدہ بزنس فورم میں شرکت کریں گے اور معاہدوں و مفاہمتی یادداشتوں کے تبادلے کی تقریب میں شرکت کریں گے۔

علاوہ ازیں وزیراعظم کی معروف چینی کمپنیوں کے سی ای اوز سے ملاقاتیں بھی ہوں گی، وزیراعظم چینی کمپنی علی بابا کے ہیڈکوارٹرز کا دورہ بھی کریں گے اور تعاون کی مفاہمتی یادداشتوں پر دستخط کی تقریب میں شرکت کریں گے۔

بعد ازاں وزیراعظم دورہ بیجنگ کیلئے روانہ ہوں گے، بیجنگ میں وزیراعظم کی چینی صدر شی جن پنگ اور وزیراعظم لی چیانگ سے ملاقاتیں ہوں گی، وزیر اعظم پاک چین سفارتی تعلقات کی 75 ویں سالگرہ کے حوالے سے منعقدہ تقریب میں شرکت بھی کریں گے.

وزیراعظم معروف چینی کمپنیوں کے سربراہان سے بھی ملاقاتیں کریں گے، وزیراعظم چائنہ اکیڈمی آف ایگری کلچر سائنسز کا بھی دورہ کریں گے۔ وزیراعظم کا دورہ چین پاکستان چین تعلقات میں نئی جہتوں کا اضافہ کریگا جس میں بالخصوص سی پیک فیز 2 کے تحت پاکستان و چینی کمپنیوں کے ساتھ تعاون میں اضافہ شامل ہے۔