لاہور: (ایجوکیشن رپورٹر) لاہور لیڈز یونیورسٹی کے 9ویں کنونشن کے تیسرے و آخری روز کی پروقار تقریب ڈی ایچ اے فیز 5کماہاں روڈ کیمپس میں ہوئی، طلبہ و طالبات، والدین، اساتذہ، صنعت و تجارت سے وابستہ شخصیات و معزز مہمانوں نے بڑی تعداد میں شرکت کی،تقریب کے مہمان خصوصی وزیر اطلاعات و نشریات عطا تارڑ تھے۔
ویڈیو لنک کے ذریعے طلبہ سے خطاب کرتے ہوئے وزیر اطلاعات نے کہا تعلیم یافتہ نوجوان پاکستان کا اصل سرمایہ ہیں،لاہور لیڈز یونیورسٹی کا نوجوانوں کو جدید تقاضوں کے مطابق علم و مہارت فراہم کرناملکی ترقی و استحکام کی ضمانت ہے۔
عطا تارڑ نے فارغ التحصیل طلبہ کو مبارکباد دیتے ہوئے کہا اپنی صلاحیتوں سے نہ صرف خود بلکہ ملک کو بھی ترقی کی راہ پر گامزن کریں،صدر لاہور ویمن چیمبر آف کامرس فلاحت عمران نے خطاب میں کہا خواتین کو اعلیٰ تعلیم ،کاروبار کے میدان میں نمایاں کردار ادا کرنا ہوگا،لیڈز یونیورسٹی کی طالبات نے مختلف شعبوں میں اپنی قابلیت و محنت سے ثابت کیا خواتین قوم کی تعمیر و ترقی میں مردوں کے شانہ بشانہ ہیں۔
457 طلبہ و طالبات کو ڈگریاں تفویض کی گئیں، 187 ایم فل ،285 بی ایس کے گریجویٹس شامل تھے، نمایاں کارکردگی دکھانے والے طلبہ میں عامر رفیق بٹ، طاہر علی، محسن تجمل قادری، عائشہ حنیف، انعم یاسین ،تحمینہ مجید کو گولڈ میڈل دئیے گئے، 27 طلبہ کو فاونڈر میڈل سرٹیفکیٹ سے نوازا گیا،تقریب میں مسز ساجدہ فاروق اور اسد منظور بٹ سمیت فیکلٹی ممبران نے بھی شرکت کی،وائس چانسلر ڈاکٹر ندیم احمد بھٹی نے کہا لاہور لیڈز یونیورسٹی تحقیق و تخلیقی تعلیم کے ذریعے عالمی معیار کے ماہرین پیدا کر رہی ہے۔
چیئرمین میاں ظہور وٹو نے طلبہ کو مبارکباد دیتے ہوئے کہا نوجوانوں کو عملی زندگی کے چیلنجز کیلئے تیار کرنا یونیورسٹی کا بنیادی مشن ہے،تقریب کے اختتام پر مہمانان خصوصی کو یادگاری شیلڈز پیش کی گئیں، اساتذہ ،طلبہ نے کامیاب کنونشن پر یونیورسٹی انتظامیہ کو مبارکباد دی۔
تعلیم یافتہ نوجوان اصل سرمایہ ، قوم کی ترقی میں کردار کلیدی ہے، عطاءتارڑ
