وزیراعلیٰ خیبرپختونخوا کی مداخلت مناسب نہیں، چیف الیکشن کمشنر جی بی

گلگت:(مشرق نیوز)چیف الیکشن کمشنر جی بی راجہ شہباز خان نے سہیل آفریدی کے سپریم کورٹ اور چیف جسٹس سپریم اپیلیٹ کورٹ کو لکھے گئے خط پر سوال اٹھاتے ہوئے کہا وزیراعلیٰ کے پی کی گلگت بلتستان کے انتخابات میں مداخلت نامناسب اور خط کی کوئی قانونی حیثیت نہیں ۔

پریس کانفرنس کرتے ہوئے راجہ شہباز خان نے کہاسوشل میڈیا کے ذریعے معلوم ہواتمام سیاسی جماعتیں ضابطہ اخلاق کی خلاف ورزی کر رہی ہیں، گورنر پنجاب ،وزرا بھی گلگت آئے تاہم کسی صورت انتخابی مہم میں شرکت کی اجازت نہیں ،ایک امیدوار کی کے پی کے عوام کو اکسانے کی کوشش جرم ،تعزیرات پاکستان کی دفعہ 154 اے کے تحت مقدمہ درج کیا جائے گا۔

چیف الیکشن کمشنر جی بی نے کہاقانون کسی بھی پارٹی کے وزرا کو گلگت بلتستان آ کر انتخابی مہم میں حصہ لینے کی اجازت نہیں دیتا،مانیٹرنگ افسروں کو ضابطہ اخلاق پر عملدرآمد یقینی بنانے کی ہدایت جاری کردی،ضابطہ اخلاق کی خلاف ورزی کرنے والے کسی بھی امیدوار کو نااہل بھی قرار دیا جا سکتا ہے۔