بھارت سن لے! پانی روکنا” ایکٹ آف وار “تصور ہوگا، رانا تنویر

شیخوپورہ:(نامہ نگار)وزیر نیشنل فوڈ سکیورٹی اینڈ ریسرچ رانا تنویر نے کہا ہے بھارت سن لے پاکستان کا پانی روکنا’ ’ایکٹ آف وار“ تصور ہو گا،ورلڈ بینک کی گارنٹی کے تحت پانی کا معاہدہ پاکستان کا قانونی حق ہے،عالمی سطح پر اہم فورمز موقف کی حمایت کر رہے ہیں۔

صحافیوںسے گفتگو کرتے ہوئے رانا تنویر نے کہا بھارت سب سے بڑا دشمن ،خفیہ ایجنسی ”را“ دہشتگردوں کی سرپرستی کر رہی ہے،اسرائیل کی کارروائیوں کے باعث کشیدگی برقرار ہے تاہم جنگ کے امکانات کم ،وزیراعظم ،فیلڈ مارشل علاقائی صورتحال پر مسلسل نظر رکھے ہوئے ہیں، آزاد کشمیر کے 38 مطالبات میں سے 36 منظور کیے جا چکے ،حکومت مسائل کے حل کےلئے مذاکرات کو ترجیح دے رہی ہے۔

وفاقی وزیر نے کہا بلوچستان ،خیبر پختونخوا میں دہشتگردی کےخلاف کارروائیاں جاری ہیں اور حکومت ہر صورت دہشتگردی پر قابو پانے کےلئے پرعزم ،مہنگائی کے باوجود پاکستان کی صورتحال کئی ممالک سے بہتر ہے،حکومت عوامی خدمت ،معاشی استحکام کےلئے اقدامات جاری رکھے گی۔